സംസ്ഥാന ചലച്ചിത്ര അവാര്‍ഡില്‍ മികച്ച നടിക്കുള്ള പുരസ്‌കാരത്തിനായി അനു സിതാരയും നിമിഷ സജയനും ഒപ്പത്തിനൊപ്പമാണ് മത്സരിച്ചരുന്നത്. സിനിമയിലെ അടുത്ത സുഹൃത്തുക്കളായ ഇരുവരും അവാര്‍ഡ് പ്രഖ്യാപനം കണ്ടതും ഒരുമിച്ചിരുന്നാണ്.
വാര്‍ത്ത സമ്മേളനം തുടങ്ങിയ സമയത്ത് കൊച്ചി പാലാരിവട്ടത്തുള്ള നിമിഷയുടെ വീട്ടിലായിരുന്നു അനു സിത്താരയും ഉണ്ടായിരുന്നത്. രാവിലെ കൊച്ചി പാലാരിവട്ടത്തുള്ള നിമിഷയുടെ വീട്ടിലേക്ക് അനു എത്തിച്ചേരുകയായിരുന്നു. മന്ത്രി എകെ ബാലന്‍ വാര്‍ത്താ സമ്മേളനം തുടങ്ങിയപ്പോള്‍ മുതല്‍ ആകാംക്ഷയോടെ കാത്തിരിക്കുകയായിരുന്നു ഇരുവരും.
ഇരുവരും ഒന്നിച്ചഭിനയിച്ച ഒരു കുപ്രസിദ്ധ പയ്യനും മത്സരത്തിലുണ്ടായിരുന്നു.
സിനിമയില്‍ ഏറ്റവും അടുത്ത സുഹൃത്തുക്കളാണ് ഇരുവരും. മികച്ച നടി നിമിഷ ആണെന്ന പ്രഖ്യാപനം വന്നയുടന്‍ നിമിഷയ്ക്ക് അനു നല്‍കിയ കിടിലന്‍ മുത്തമാണ് സൈബര്‍ ലോകത്ത് വൈറലായിരിക്കുന്നത്.
അവാര്‍ഡ് പ്രഖ്യാപിച്ചപ്പോള്‍ അത്ഭുതത്തോടെ ഇരിക്കുകയായിരുന്നു നിമിഷ, സന്തോഷത്തോടെ നിമിഷയെ ചേര്‍ത്ത് നിര്‍ത്തി ഉമ്മ കൊടുത്തായിരുന്നു അനു സിത്താര സന്തോഷം പ്രകടിപ്പിച്ചത്.
തനിക്ക് കിട്ടിയില്ലെങ്കിലും നിമിഷയുടെ സന്തോഷത്തില്‍ പങ്കുചേര്‍ന്ന് സന്തോഷിക്കുന്ന അനു സിത്താരയ്ക്ക് പിന്നെ അഭിനന്ദന പ്രവാഹമായിരുന്നു.
മികച്ച നടിയായി തെരഞ്ഞെടുപ്പെട്ടതില്‍ ഒരുപാട് സന്തോഷമുണ്ടെന്ന് നിമിഷ അറിയിച്ചു. ഇതുവരെ ചെയ്ത ജോലി അംഗീകരിക്കപ്പെട്ടതില്‍ സന്തോഷമുണ്ട്. ചെയ്തതില്‍ ഏറ്റവും ബുദ്ധിമുട്ടായി തോന്നിയത് ചോലയിലെ വേഷമാണ്. ഒരു സ്‌കൂള്‍ കുട്ടിയുടെ വേഷമായിരുന്നു അതില്‍. ഇനിയും കഠിനാധ്വാനം തുടരുമെന്നും തരുന്ന ജോലി വൃത്തിയായി ചെയ്യുക മാത്രമാണ് ചെയ്യുന്നതെന്നും അവര്‍ പറഞ്ഞു. മലയാളത്തില്‍ നല്ല കഥാപാത്രങ്ങള്‍ കിട്ടുന്നുണ്ട്.
Discussion about this post