ബാഹുബലി എന്ന ചിത്രത്തിലൂടെ ആരാധകരുടെ പ്രിയം നേടിയ ജോഡികളാണ് പ്രഭാസും അനുഷ്‌കയും. വീണ്ടും ഇവര്‍ ഒന്നിക്കുന്ന ചിത്രത്തിനായുള്ള കാത്തിരിപ്പിലാണ് ആരാധകര്‍. എന്നാല്‍ ആരാധകരെ നിരാശയില്‍ ആഴ്ത്തിയിരിക്കുകയാണ് പ്രഭാസ്. അടുത്ത് അത്തരമൊരു ഒന്നിക്കല്‍ അവസരമുണ്ടായിട്ടും ആ ചിത്രം വേണ്ടെന്ന് വെച്ചിരിക്കുകയാണ് പ്രഭാസ്. അനുഷ്‌ക, മാധവന്‍ തുടങ്ങിയവര്‍ പ്രധാന വേഷങ്ങളില്‍ എത്തുന്ന സൈലന്‍സ് എന്ന ചിത്രത്തില്‍ നിന്നാണ് പ്രഭാസ് പിന്മാറിയത്.
സിനിമയില്‍ ഒരു അതിഥി വേഷമായിരുന്നു സൂപ്പര്‍ താരത്തിന് ലഭിച്ചത്. എന്നാല്‍ സാഹോ എന്ന തന്റെ ചിത്രവുമായി തിരക്കിലായതിനാല്‍ ഈ ചിത്രത്തിന് ഡേറ്റ് കണ്ടെത്താന്‍ പ്രഭാസിനായില്ല. ഇതിനാലാണ് പ്രഭാസ് ചിത്രം വേണ്ടെന്ന് വെച്ചത്. പ്രഭാസിനു പകരം റാണ ദഗുബതിയാവും ചിത്രത്തിലെത്തുക. സിനിമയുടെ സെറ്റില്‍ റാണ ജോയിന്‍ ചെയ്തു. ഹേമന്ദ് മധുകര്‍ സംവിധാനം ചെയ്യുന്ന ചിത്രത്തില്‍ സംസാര ശേഷിയില്ലാത്ത യുവതിയായാണ് അനുഷ്‌ക എത്തുന്നത്.
സഹോയാണ് പുറത്തിറങ്ങാനിരിക്കുന്ന പ്രഭാസിന്റെ ഏറ്റവും പുതിയ ചിത്രം. ചിത്രത്തിന്റെ ആക്ഷന്‍ രംഗങ്ങള്‍ക്ക് മാത്രം 90 കോടി രൂപയാണ് ചെലവെന്നാണ് റിപ്പോര്‍ട്ട്.