ഏറെ നാളത്തെ ഇടവേളയ്ക്ക് ശേഷം നല്ലൊരു കുടുംബ ചിത്രവുമായി ജയറാം എത്തിയിരിക്കുകയാണ്.’ലോനപ്പന്റെ മാമ്മോദീസ’യ്ക്ക് മികച്ച പ്രതികരണമാണ് തീയ്യേറ്ററുകളില്‍. ചിത്രം മനോഹരമായ ഒരു ഫീല്‍ ഗുഡ് കുടുംബ ചിത്രമെന്നാണ് കണ്ടിറങ്ങിയവര്‍ പറയുന്നത്. ചിത്രം വിതരണത്തിന് എത്തിച്ചിരിക്കുന്നത് സംവിധായകന്‍ സിദ്ധിഖിന്റെ എസ് ടാക്കീസാണ്. ആദ്യമായിട്ടാണ് എസ് ടാക്കീസ് പുറത്ത് നിന്നൊരു ചിത്രം വിതരണത്തിന് എത്തിക്കുന്നത്. ആദ്യമായി പുറത്തു നിന്നൊരു ചിത്രം ചെയ്യാം എന്ന തന്റെ തീരുമാനം പൂര്‍ണമായും ശരിയായിരുന്നെന്ന് ചിത്രം കണ്ടപ്പോള്‍ തോന്നിയെന്നാണ് സിദ്ധിഖ് പറഞ്ഞത്.
‘എന്റെ സ്വന്തം സിനിമകള്‍ നിര്‍മ്മിക്കാനും വിതരണം ചെയ്യുവാനുമാണ് എസ് ടാക്കീസിന് ഞാന്‍ രൂപം കൊടുത്തത്. പക്ഷേ ഈ സിനിമയുടെ കഥ ലിയോ എന്നോട് പറഞ്ഞപ്പോള്‍ വളരെ രസം തോന്നി. അപ്പോള്‍ എനിക്ക് തോന്നി എന്തുകൊണ്ട് ഈ സിനിമ എസ് ടാക്കീസിലൂടെ വിതരണം ചെയ്തു കൂടാ. അങ്ങനെയാണ് ചിത്രം എസ് ടാക്കീസ് വിതരണം ചെയ്തത്. ചിത്രം പുറത്തിറങ്ങി അത് കണ്ട് കഴിഞ്ഞപ്പോള്‍ അന്ന് ഞാനെടുത്ത തീരുമാനം വളരെ ശരിയാണെന്ന് തോന്നി. അത്രമാത്രം രസകരമാണീ സിനിമ’. സിദ്ധിഖ് പറഞ്ഞു. ചിത്രം കുടുംബസമേതം പോയി എല്ലാവരും കാണണമെന്നും സിദ്ധിഖ് പറഞ്ഞു.
ലിയോ തദ്ദേവൂസ് സംവിധാനം ചെയ്ത ചിത്രത്തില്‍ ഒരു വാച്ച് മെക്കാനിക്കായിട്ടാണ് ജയറാം എത്തുന്നത്. ശാന്തി കൃഷ്ണ, കനിഹ, നിഷ സാരംഗ്, ഇഷ പവിത്രന്‍, ദിലീഷ് പോത്തന്‍, ജോജു ജോര്‍ജ്, അലന്‍സിയര്‍, ഹരീഷ് കണാരന്‍ തുടങ്ങിയവരാണ് ചിത്രത്തിലെ മറ്റ് താരങ്ങള്‍. പെന്‍ ആന്‍ഡ് പേപ്പര്‍ ക്രിയേഷന്‍സിന്റെ ബാനറില്‍ ഷിംനോയ് മാത്യു ആണ് ഈ ചിത്രം നിര്‍മ്മിച്ചിരിക്കുന്നത്.
Discussion about this post