പതിനേഴ് ജീവനുകള്‍ കവര്‍ന്ന നിപ്പാ വൈറസിനെ പ്രമേയമാക്കി ഒരുക്കുന്ന ആഷിഖ് അബു ചിത്രം ‘വൈറസി’ന്റെ റിലീസ് തീയ്യതി പ്രഖ്യാപിച്ചു. സംവിധായകന്‍ ആഷിഖ് അബു ഫേസ്ബുക്കിലൂടെയാണ് ഇക്കാര്യം അറിയിച്ചത്. ചിത്രത്തിന്റെ പുതിയ പോസ്റ്ററും പുറത്ത് വിട്ടിട്ടുണ്ട്. ആശുപത്രിയുടെ പശ്ചാത്തലത്തിലുള്ള പുതിയ പോസ്റ്ററില്‍ ചിത്രത്തിലെ പ്രധാന താരങ്ങളുടെ പേര് സഹിതമാണ് എത്തിയിരിക്കുന്നത്.
കോഴിക്കോട് മെഡിക്കല്‍ കോളേജില്‍ വെച്ചാണ് ചിത്രത്തിന്റെ ചിത്രീകരണം ആരംഭിച്ചത്. വന്‍ താരനിര തന്നെയുണ്ട് ചിത്രത്തില്‍. റിമ കല്ലിങ്കലാണ് സിസ്റ്റര്‍ ലിനിയായി എത്തുന്നത്. ആരോഗ്യ മന്ത്രി കെകെ ശൈലജയുടെ വേഷത്തിലെത്തുന്നത് നടി രേവതിയാണ്. കളക്ടര്‍ യുവി ജോസായി എത്തുന്നത് ടോവീനോ തോമസ് ആണ്. നിപ്പാ പനിക്കു കടിഞ്ഞാണിടുന്ന സംഘത്തിലെ ഒരു പ്രധാന ഉദ്യോഗസ്ഥന്റെ റോളില്‍ ഇന്ദ്രജിത്തും, കുഞ്ചാക്കോ ബോബനും എത്തുന്നുണ്ട്. പാര്‍വതി, രമ്യ നമ്പീശന്‍, സൗബിന്‍ ഷാഹിര്‍, ദിലീഷ് പോത്തന്‍, ചെമ്പന്‍ വിനോദ് തുടങ്ങിയവരാണ് ചിത്രത്തിലെ മറ്റ് താരങ്ങള്‍.
ആഷിഖ് അബുവും റിമ കല്ലിങ്കലും ചേര്‍ന്നാണ് ചിത്രം നിര്‍മ്മിച്ചിരിക്കുന്നത്. ചിത്രത്തിന്റെ ക്യാമറ രാജീവ് രവിയാണ്. സുഷിന്‍ ശ്യാം ആണ് സംഗീതം. ഏപ്രില്‍ 11ന് ചിത്രം തീയ്യേറ്ററുകളിലെത്തും.
