തെന്നിന്ത്യന്‍ നടന്‍ അര്‍ജുന്‍ സര്‍ജയ്‌ക്കെതിരെ മീ ടൂ ആരോപണം ഉന്നയിച്ച തനിക്ക് നടന്റെ ആരാധകരില്‍നിന്ന് ഭീഷണി നേരിടുകയാണെന്ന് നടി ശ്രുതി ഹരിഹരന്‍. തന്റെ ഫോണിലേക്ക് അര്‍ജുന്‍ ഫാന്‍സിന്റെ ഭീഷണി സന്ദേശങ്ങള്‍ വന്നുകൊണ്ടിരിക്കുകയാണ്. ഫിലിം ഇന്റസ്ട്രി ഫോര്‍ റൈറ്റ്‌സ് ആന്റ് ഇക്വാലിറ്റി സംഘടിപ്പിച്ച പ്രസ് കോണ്‍ഫറന്‍സില്‍ സംസാരിക്കുകയായിരുന്നു ശ്രുതി. അര്‍ജുന്‍ തന്നോട് മോശമായി പെരുമാറിയെന്ന് ദിവസങ്ങള്‍ക്ക് മുമ്പാണ് ശ്രുതി വെളിപ്പെടുത്തിയത്.
തനിക്ക് നിരന്തരമായി ഭീഷണിമുഴക്കിക്കൊണ്ടുള്ള കോളുകള്‍ വരുന്നുണ്ട്. അറിയാത്ത നമ്പറില്‍നിന്നുള്ള ഫോണ്‍ കോളുകള്‍ എടുക്കുന്നത് തന്നെ നിര്‍ത്തി വച്ചിരിക്കുകയാണ് ഇപ്പോള്‍. അര്‍ജുന്റെ ഫാനുകളിലൊരാളാണ് ഒരു കോള്‍ ചെയ്തതെന്ന് താന്‍ ട്രൂ കോളറില്‍നിന്ന് തിരിച്ചറിഞ്ഞുവെന്നും ശ്രുതി പറഞ്ഞു. ആരോപണം ഉന്നയിച്ചതിനാല്‍ കന്നടയില്‍ സിനിമ നഷ്ടമാകുമെന്ന് പേടിയില്ലേ എന്ന ചോദ്യത്തിന് ഇല്ലെന്നും അടുത്ത വര്‍ഷവും തുടര്‍ന്നും സിനിമയില്‍ തന്നെ കാണാമെന്നായിരുന്നു ശ്രുതിയുടെ മറുപടി.
ഒരു സീനില്‍ അഭിനയിക്കുന്നതിന് മുന്‍പ് എന്റെ അനുവാദം കൂടാതെ അര്‍ജുന്‍ തന്നെ കെട്ടിപ്പിടിച്ചു. അതിന് ശേഷം ഇങ്ങനെ ചെയ്താല്‍ കൂടുതല്‍ നന്നാവില്ലേയെന്ന് അര്‍ജുന്‍ സംവിധായകനോട് ചോദിക്കുകയും ചെയ്തു. പെട്ടന്ന് ഉണ്ടായ സംഭവത്തില്‍ താന്‍ ഞെട്ടി, അങ്ങേയറ്റം അപമാനിക്കപ്പെട്ടത് പോലെ തോന്നി. സാധാരണ ഒരോ സീനിലും റിഹേഴ്‌സല്‍ പതിവാണ്. ഇത് നടന്നത് ആ സീനിന്റെ റിഹേഴ്‌സല്‍ നടക്കുന്നതിന് മുന്‍പാണ് ശ്രുതി പറഞ്ഞു. ഷൂട്ടിങ്ങിനെത്തിയ ഏകദേശം അമ്പതോളം ആളുകളുടെ മുമ്പില്‍ വച്ചായിരുന്നു ആ സംഭവമെന്നും ശ്രുതി വെളിപ്പെടുത്തിയിരുന്നു.
എന്നാല്‍ തനിക്കെതിരെ ഉയര്‍ന്ന ലൈംഗികാരോപണം നിഷേധിച്ച് അര്‍ജുന്‍ രംഗത്തെത്തി. ആരോപണം അടിസ്ഥാന രഹിതമെന്നാണ് ഒരു വാര്‍ത്താ മാധ്യമത്തിന് നല്‍കിയ അഭിമുഖത്തില്‍ അര്‍ജ്ജുന്‍ പ്രതികരിച്ചത്. ഇത്തരം വ്യാജ ആരോപണം കേട്ട് താന്‍ ഞെട്ടിപ്പോയെന്നും അര്‍ജ്ജുന്‍ പറഞ്ഞു.
Discussion about this post