മമ്മൂട്ടിയെ നായകനാക്കി വൈശാഖ് സംവിധാനം ചെയ്യുന്ന ‘മധുരരാജ’യുടെ ഫസ്റ്റ് ലുക്ക് പോസ്റ്റര്‍ പുറത്തെത്തി. എട്ട് വര്‍ഷങ്ങള്‍ക്ക് മുന്‍പ് പുറത്തിറങ്ങിയ ‘പോക്കിരിരാജ’യുടെ രണ്ടാം ഭാഗമായിട്ടാണ് മധുരരാജ ഒരുങ്ങുന്നത്. പോക്കിരിരാജയുടെ തിരക്കഥ ഉദയ്കൃഷ്ണ-സിബി കെ തോമസ് കൂട്ട് കെട്ടില്‍ ആയിരുന്നെങ്കില്‍ മധുരരാജയില്‍ ഉദയ്കൃഷ്ണയുടെതാണ് തിരക്കഥ. പോക്കിരിരാജയില്‍ വന്ന അതേ ഗെറ്റപ്പില്‍ തന്നെയാണ് പുതിയ ചിത്രത്തിലും മമ്മൂട്ടി എത്തുന്നതെന്നാണ് ഫസ്റ്റ് ലുക്കില്‍ നിന്നും മനസ്സിലാകുന്നത്.
മോഹന്‍ലാലിനെ നായകനാക്കി ഒരുക്കിയ പുലിമുരുകന്‍ ആയിരുന്നു വൈശാഖിന്റേതായി പുറത്തുവരുന്ന അവസാന ചിത്രം. പുലിമുരുകന്റെ ആക്ഷന്‍ ഡയറക്ടര്‍ പീറ്റര്‍ ഹെയ്ന്‍ തന്നെയാണ് മധുരരാജയ്ക്കും ആക്ഷന്‍ ഒരുക്കുന്നത്. ഷാജി കുമാര്‍ ഛായാഗ്രഹണവും ഗോപി സുന്ദര്‍ സംഗീതവും നിര്‍വ്വഹിച്ചിരിക്കുന്നു. നെല്‍സണ്‍ ഐപ്പ് ആണ് നിര്‍മ്മാണം. വിഷുവിന് ചിത്രം തീയേറ്ററുകളിലെത്തും.