മുംബൈ: ബോളിവുഡ് നടി രവീണ ടണ്ഠന്റെ കാറിടിച്ച് മൂന്നുപേർക്ക് പരിക്കേറ്റതായി പരാതി. മുംബൈ ബാന്ദ്രയിലെ റിസ്വി കോളേജിന് മുന്നിൽ വെച്ചായിരുന്നു സംഭവം. കാറിടിച്ച് മൂന്ന് പേർക്ക് പരിക്കേറ്റതോടെ നാട്ടുകാർ പ്രകോപിതരാവുകയും രവീണയെ കയ്യേറ്റം ചെയ്തതായും റിപ്പോർട്ടുണ്ട്. രവീണയുടെ ഡ്രൈവർ അമിതവേഗത്തിൽ കാറോടിച്ചതാണ് അപകട കാരണമെന്ന് നാട്ടുകാർ ആരോപിച്ചു.
അതേസമയം, കാറിടിച്ചതിന് പിന്നാലെ പിൻസീറ്റിൽ നിന്നും പുറത്തേക്കിറങ്ങിയ നടി നാട്ടുകാരോട് തട്ടിക്കയറിയതായും ആരോപണമുണ്ട്. നടി മദ്യലഹരിയിലായിരുന്നു എന്നാണ് ദൃക്സാക്ഷികളുടെ മൊഴി. തുടർന്നാണ് നാട്ടുകാരുമായി കൈയ്യാങ്കളിയുമുണ്ടായത്. സംഭവത്തിന്റെ വീഡിയോ സോഷ്യൽ മീഡിയയിൽ പ്രചരിക്കുകയാണ്.
രവീണയുടെ ഡ്രൈവർ തന്റെ ബന്ധുവിനേയും അമ്മയേയും ആക്രമിച്ചെന്നും അമ്മയ്ക്ക് തലയ്ക്ക് മുറിവേറ്റെന്നും പരിക്കേറ്റ മൊഹ്സിൻ ഷെയ്ഖ് എന്നയാൾ പ്രതികരിച്ചു. സമീപത്തെ ഖർ പോലീസ് സ്റ്റേഷനിൽ വിളിച്ച് സംഭവം അറിയിച്ചിട്ടും പോലീസ് ഇടപെട്ടില്ലെന്നും കേസെടുക്കാൻ വിമുഖത കാണിച്ചെന്നും ഇവർ ആരോപിക്കുന്നു. നാലു മണിക്കൂർ കാത്തുനിന്നിട്ടും പരാതി ഫയൽ ചെയ്യാൻ വിസമ്മതിച്ചെന്നും അദ്ദേഹം ആരോപിച്ചു.
അതേസമയം, പുറത്തെത്തിയ വീഡിയോയിൽ മൂക്കിൽ നിന്നും പരിക്കേറ്റ് രക്തം വരുന്ന നിലയിലുള്ള ഒരു സ്ത്രീ സംസാരിക്കുന്നത് കേൾക്കാം. തന്നെ പിന്നിലേക്ക് തള്ളരുതെന്നും ദേഹോപദ്രവം ഏൽപ്പിക്കരുതെന്നും രവീണ പറയുന്നതും വീഡിയോയിലുണ്ട്.
Discussion about this post