തന്റെ സിനിമയെ സമൂഹമാധ്യമങ്ങളിലൂടെ സിനിമ മോശമാണെന്ന് വരുത്തിത്തീര്‍ക്കാന്‍ ശ്രമിച്ചെന്ന സംവിധായകന്‍ ഉബൈനിയുടെ പരാതിയില്‍ കൊച്ചി സിറ്റി പോലീസ് കേസ് രജിസ്റ്റര്‍ ചെയ്തു. സിനിമയ്ക്ക് മോശം റിവ്യൂ നല്‍കിയതിന്റെ പേരില്‍ ആദ്യമായി രജിസ്റ്റര്‍ ചെയ്യുന്ന കേസാണിത്.
‘റാഹേല്‍ മകന്‍ കോര’ എന്ന സിനിമയുടെ സംവിധായകനാണ് ഉബൈനി. ഇദ്ദേഹത്തിന്റെ പരാതിയിലാണ് നടപടി. പ്രമുഖ ഓണ്‍ലൈന്‍ റിവ്യൂവര്‍ അശ്വന്ത് കോക്ക് അടക്കം ഒമ്പതു പേര്‍ക്കെതിരെയാണ് കേസ് രജിസ്റ്റര്‍ ചെയ്തിരിക്കുന്നത്.
ഈ കേസില്‍ സമൂഹമാധ്യമങ്ങളിലൂടെ സിനിമയ്ക്ക് മോശം റിവ്യൂ നല്‍കിയ വ്യക്തികളും, യൂട്യൂബ് ചാനലുകളും പ്രതിപ്പട്ടികയില്‍ ഉള്‍പ്പെട്ടിട്ടുണ്ട്. റിലീസ് ചെയ്ത ഉടന്‍തന്നെ പുതിയ സിനിമകളെക്കുറിച്ച് മോശം പ്രതികരണം നടത്തുന്നത് റിവ്യൂ ബോംബിങ്ങാണെന്ന് നേരത്തെ അമിക്കസ് ക്യൂറി ഹൈക്കോടതിയില്‍ റിപ്പോര്‍ട്ട് നല്‍കിയിരുന്നു.
പിന്നാലെ ഈ വിഷയത്തില്‍ നിരവധി ചര്‍ച്ചകളും ഉയര്‍ന്നിരുന്നു. ‘ആരോമലിന്റെ ആദ്യത്തെ പ്രണയം’ എന്ന ചിത്രത്തിന്റെ സംവിധായകന്‍ മുബീന്‍ റൗഫ് നല്‍കിയ ഹര്‍ജിയിലാണ് അമിക്കസ് ക്യൂറി റിപ്പോര്‍ട്ട് അന്ന് നല്‍കിയത്. ഇതിനുഷേഷം ആദ്യമായാണ് പോലീസ് റിവ്യൂ ചെയ്തതിന് കേസ് രജിസ്റ്റര്‍ ചെയ്തിരിക്കുന്നത്.
Discussion about this post