ഏറെ വിവാദമായ ‘പദ്മിനി’ സിനിമയുടെ നിര്‍മ്മാതാവ് സുവിന്‍ കെ വര്‍ക്കി ഉന്നയിച്ച ആരോപണങ്ങള്‍ക്ക് ഒടുവില്‍ മറുപടിയുമായി കുഞ്ചാക്കോ ബോബന്‍. 25 ദിവസത്തെ ഷൂട്ടിന് രണ്ടരക്കോടി രൂപ താരം പ്രതിഫലമായി വാങ്ങിയ കുഞ്ചാക്കോ ചിത്രത്തിന്റെ പ്രമോഷന് വരാതെ വിദേശത്ത് വിനോദയാത്രയ്ക്ക് പോയെന്നായിരുന്നു സുവിന്‍ന്റെ ആരോപണം.
ഒടുവില്‍ താരം വിവാദത്തെ സംബന്ധിച്ച് മനസ് തുറക്കുകയാണ്. ഒരു വിവാദത്തിന്റെ പശ്ചാത്തലത്തിലോ നെഗറ്റീവ് പബ്ലിസിറ്റി മൂലമോ അല്ല ഒരു സിനിമ ശ്രദ്ധിക്കപ്പെടേണ്ടത് എന്ന പൂര്‍ണബോധ്യം തനിക്കുണ്ട് എന്നും അതുകൊണ്ടാണ് ഇതേപ്പറ്റി അന്ന് മിണ്ടാതിരുന്നത് എന്ന് കുഞ്ചോക്കോ പറഞ്ഞു.
പ്രൊമോഷന്‍ നല്‍കാത്തതിനാല്‍ സിനിമ പരാജയപ്പെട്ടോട്ടെ എന്ന് ചിന്തിക്കാന്‍ മാത്രം സെന്‍സില്ലാത്ത ആളല്ല താന്‍. പ്രൊമോഷന്‍ പരിപാടികള്‍ പലപ്പോഴും പെട്ടന്ന് തീരുമാനിക്കുന്നതാണെന്നും മലയാള മനോരമയ്ക്ക് നല്‍കിയ അഭിമുഖത്തില്‍ കുഞ്ചാക്കോ പറഞ്ഞു.
എന്റെ പടം വിജയിക്കേണ്ടത് മറ്റാരേക്കാളും എന്റെ ആവശ്യമാണ്. പ്രൊമോഷന്‍ നല്‍കാത്തതിനാല്‍ അത് പരാജയപ്പെട്ടോട്ടെ എന്ന് ചിന്തിക്കാന്‍ മാത്രം സെന്‍സില്ലാത്ത ആളല്ല ഞാന്‍. എന്റേതല്ലാത്ത സിനിമകള്‍ക്ക് പോലും പ്രൊമോഷന്‍ നല്‍കാന്‍ ഞാന്‍ മടികാണിക്കാറില്ല. കാരണം, സിനിമ കാണാന്‍ ആളെത്തിയാല്‍ എല്ലാവര്‍ക്കും മെച്ചമാണ്. പക്ഷെ ആ മേഖലയില്‍ എല്ലാ കാര്യങ്ങളും മുന്‍കൂട്ടി തീരുമാനിച്ചത് പോലെയല്ല നടക്കുക.
പ്രൊമോഷന്‍ ഷൂട്ട് പലപ്പോഴും പെട്ടന്ന് തീരുമാനിക്കുന്നതാണ്. ആ സമയം ചിലപ്പോള്‍ സ്ഥലത്തുണ്ടാകാതിരിക്കുകയോ മറ്റ് ലോക്കേഷനിലായിരിക്കുകയോ ആരോഗ്യപ്രശ്‌നങ്ങള്‍ ഉണ്ടാവുകയോ ഒക്കെ ചെയ്‌തേക്കാം. ഈ മൂന്ന് കാര്യങ്ങളും വിവാദമുണ്ടായ ചിത്രത്തിന്റെ പ്രൊമോഷനില്‍ സംഭവിച്ചെന്നും കുഞ്ചാക്കോ വിശദീകരിച്ചു.
ഒരു ഫീല്‍ഗുഡ് സിനിമ വിവാദത്തിന്റെ പശ്ചാത്തലത്തിലോ നെഗറ്റീവ് പബ്ലിസിറ്റി മൂലമോ അല്ല ശ്രദ്ധിക്കപ്പെടേണ്ടത് എന്ന പൂര്‍ണബോധ്യം ഉള്ളതുകൊണ്ടാണ് താന്‍ ഇതേപ്പറ്റി മിണ്ടാതിരുന്നത് എന്നും കുഞ്ചക്കോ ബോബന്‍ വിശദീകരിച്ചു.