കൊച്ചി: സിനിമയില്‍ ലഹരി ഉപയോഗിക്കുന്ന അഭിനേതാക്കളുടെ പട്ടിക ‘അമ്മ’യുടെ പക്കലുണ്ടെന്ന് അമ്മ ഭരണസമിതിയംഗം നടന്‍ ബാബുരാജ് വെളിപ്പെടുത്തിയിരുന്നു. ഇപ്പോഴിതാ സംഭവത്തില്‍ പ്രതികരിച്ച് രംഗത്തെത്തിയിരിക്കുകയാണ് ഇടവേള ബാബു.
ബാബുരാജിന്റെ വാക്കുകളെ തള്ളിയാണ് ഇടവേള ബാബുവിന്റെ പ്രതികരണം. ‘എന്റെ കൈയില്‍ പട്ടികയൊന്നുമില്ല, നിര്‍മ്മാതാക്കള്‍ രേഖാമൂലം ഇതുവരെ പരാതി നല്‍കിയിട്ടില്ല, അമ്മയിലും ഇത് ചര്‍ച്ചയായിട്ടില്ല.’ എന്നാല്‍ ആരെല്ലാമാണ് സിനിമാ മേഖലയില്‍ ലഹരിയുപയോഗിക്കുന്നതെന്ന് പരസ്യമായ രഹസ്യമാണെന്നും ഇടവേള ബാബു പറഞ്ഞു.
ലഹരിമരുന്ന് ജോലി ചെയ്യുമ്പോഴോ ജോലി സ്ഥലത്തോ ഉപയോഗിക്കാനോ പൊതുസ്ഥലത്ത് മോശമായി പെരുമാറാനോ പാടില്ലെന്ന നിബന്ധന സംഘടനയുടെ ബൈലോയില്‍ ഉള്‍പ്പെടുത്തിയിരുന്നു. പുതിയ അംഗത്വ അപേക്ഷയില്‍ കര്‍ശനമായി ലഹരിമരുന്ന് ഉപയോഗം പരിശോധിക്കുമെന്നും ഇടവേള ബാബു അറിയിച്ചു.
അതേസമയം സിനിമാപ്രവര്‍ത്തകരുടെ വെളിപ്പെടുത്തലില്‍ നടപടി ഉണ്ടാവുമെന്ന് കൊച്ചി സിറ്റി പൊലീസ് കമ്മീഷണര്‍ കെ.സേതുരാമന്‍ വ്യക്തമാക്കിയിരുന്നു. പരാതി ലഭിച്ചാല്‍ തുടര്‍നടപടി സ്വീകരിക്കും. എക്സൈസ് ഇതില്‍ അന്വേഷണം നടത്തുന്നുണ്ട്.
Discussion about this post