തിരുവനന്തപുരം: ആരോടും വിരോധം കാത്തുവെക്കാത്ത നല്ലൊരു നടനായിരുന്നു മാമുക്കോയയെന്ന് നടന്‍ സായി കുമാര്‍. മാമുക്കോയുടെ വിയോഗത്തില്‍ ഒത്തിരി വേദനയുണ്ടെന്നും സത്യസന്ധനായ മനുഷ്യനായിരുന്നുവെന്നും സായി കുമാര്‍ പറയുന്നു.
ഒരു നല്ല സുഹൃത്തുമായിരുന്നു അദ്ദേഹം. അദ്ദേഹത്തിന് ഹൃദയാഘാതം സംഭവിച്ചെന്ന് അറിഞ്ഞപ്പോഴും തിരിച്ചുവരുമെന്ന് കരുതിയിരുന്നു. ബന്ധത്തെ കുറിച്ച് എങ്ങിനെ വിശദീകരിക്കാനാണ് ഞാന്‍. വാക്കുകള്‍ കൊണ്ട് വിശദീകരിക്കാനാവുന്ന സൗഹൃദമല്ലെന്നും സായി കുമാര്‍ പറഞ്ഞു.
ഈ നിമിഷം പല ഓര്‍മ്മകളും മനസിലൂടെ പോകുന്നു. ബാലകൃഷ്ണായെന്ന വിളിയാണ് ചെവിയില്‍ മുഴങ്ങുന്നത്. നാടകത്തില്‍ കൂടിയാണ് ഞാനും അദ്ദേഹവും വന്നത്. സഹിക്കാന്‍ പറ്റുന്നില്ല. വല്ലാത്തൊരു അനുഭവമാണെന്നും അനുഭവങ്ങളുടെ പാഠപുസ്തകമായിരുന്നു ഇന്നസെന്റേട്ടനും മാമുക്കോയയുമൊക്കെയെന്നും സായികുമാര്‍ പറഞ്ഞു.
അതിയായ ദുഃഖമുണ്ടെന്നും വ്യത്യസ്തനായ വ്യക്തിയായിരുന്നു മാമുക്കോയ എന്നും സ്നേഹസമ്പന്നനായിരുന്നുവെന്നും ജനാര്‍ദ്ദനനും പ്രതികരിച്ചു. മാമുക്കോയ എതിരാളികള്‍ ഇല്ലാത്ത വ്യക്തിയായിരുന്നുവെന്നും ജനാര്‍ദ്ദനന്‍ മാധ്യമങ്ങളോട് പറഞ്ഞു.
