യുവതാരം വിൻസി അലോഷ്യസ് കേന്ദ്ര കഥാപാത്രത്തിൽ എത്തുന്ന ചിത്രമാണ് സസ്‌പെൻസ് ത്രില്ലറായ രേഖ. കാസർകോട് ഗ്രാമത്തിന്റെ പശ്ചാത്തലത്തിലാണ് ചിത്രം ഒരുക്കിയിരിക്കുന്നത്. ചിത്രത്തിന് മികച്ച അഭിപ്രായമാണ് ഉയർന്നു കേൾക്കുന്നത്. എന്നാൽ ഇതിനിടെ സിനിമയ്ക്ക് വേണ്ടത്ര ഷോകൾ ലഭിക്കാത്തതിന്റെ നിരാശ പങ്കിടുകയാണ് നടി വിൻസി അലോഷ്യസ്. ഇൻസ്റ്റഗ്രാമിലൂടെയാണ് താരം തന്റെ സങ്കടം പങ്കിട്ടത്.
”ഒരു പോസ്റ്റർ പോലും ഇല്ലാത്ത സിനിമ, അത് ഒരുപക്ഷേ ഞങ്ങളുടെ ആയിരിക്കും. കളിക്കുന്ന തിയറ്ററിൽ പോലും പോസ്റ്റർ ഇല്ല, ഒരു സിനിമയ്ക്കും ഈ ഗതി വരരുത്. ഞങ്ങളുടെ സിനിമ രേഖ, വലിയ തിയറ്ററുകളോ ഷോസോ ഒന്നും ഇല്ല. ഒരുപാട് കഷ്ടപ്പെട്ട് ചെയ്ത സിനിമയാണ്. ആളുകൾ ചോദിക്കുന്നു ഷോകൾ കുറവാണല്ലോ, ഞങ്ങളുടെ നാട്ടിൽ ഇല്ലല്ലോ, പോസ്റ്റർ ഇല്ലല്ലോ എന്നൊക്കെ. സത്യം പറഞ്ഞാൽ നല്ല വിഷമം ഉണ്ട്. ഇങ്ങനെ ആവും എന്ന് വിചാരിച്ചില്ല. ആകെയുള്ളത് ഞങ്ങളുടെ സിനിമയിലുള്ള വിശ്വാസം മാത്രം. വലിയ സ്റ്റാർ കാസ്റ്റ് ഒന്നും ഇല്ലാത്തതിനാൽ ഞങ്ങൾ ഇത്രയൊക്കെ പ്രതീക്ഷിച്ചാൽ മതി.” വിൻസി കുറിക്കുന്നു.
വിൻസി അലോഷ്യസിനെ പ്രധാന കഥാപാത്രമാക്കി ജിതിൻ ഐസക്ക് തോമസ് സംവിധാനം ചെയ്ത ചിത്രമാണ് രേഖ. തമിഴിലെ പ്രശസ്ത സംവിധായകൻ കാർത്തിക് സുബ്ബരാജിന്റെ ഉടമസ്ഥതയിലുള്ള സ്റ്റോൺ ബെഞ്ചേഴ്‌സ് ആണ് ചിത്രം അവതരിപ്പിക്കുന്നത്. പ്രേമലത തൈനേരി, രാജേഷ് അഴിക്കോടൻ, രഞ്ജി കാങ്കോൽ, പ്രതാപൻ കെ എസ്, വിഷ്ണു ഗോവിന്ദൻ എന്നിവരാണ് ചിത്രത്തിലെത്തുന്ന മറ്റ് താരങ്ങൾ.
Discussion about this post