പതിവ് തെറ്റിക്കാതെ വിജയ് ദേവകൊണ്ട; ക്രിസ്മസ് സമ്മാനമായി 100 ആരാധകർക്ക് സൗജന്യയാത്ര

പതിവ് തെറ്റിക്കാതെ 100ഓളം ആരാധകർക്ക് ക്രിസ്മസ് സമ്മാനമായി സൗജന്യയാത്ര ഒരുക്കി തെന്നിന്ത്യൻ സൂപ്പർ താരം വിജയ് ദേവരകൊണ്ട. എല്ലാ ക്രിസ്മസിനും തന്റെ ആരാധകർക്ക് നൽകുന്ന സർപ്രൈസ് ആണ് ഇത്തവണയും തുടർന്നത്. കേട്ടത് സത്യമാണോ എന്ന് ആശയക്കുഴപ്പത്തിലായി നിന്ന ആരാധകർക്ക് മുന്നിലേക്ക് അധികം വൈകാതെ തന്നെ ഉറപ്പിക്കുന്ന ഒരു ട്വീറ്റും പ്രത്യക്ഷപ്പെട്ടു.

ഒരു പോൾ ആണ് നടൻ ക്രിയേറ്റ് ചെയ്തത്. പോകണമെന്ന് ആഗ്രഹമുള്ള മേഖലകൾ ആരാധകർക്ക് വോട്ടിങ്ങിലൂടെ തിരഞ്ഞെടുക്കാനായിരുന്നു ഇത്. ഇന്ത്യയിലെ മലനിരകൾ, ഇന്ത്യയിലെ കടൽത്തീരങ്ങൾ, കൾച്ചർ ട്രിപ്പ്, ഇന്ത്യയിലെ മരുഭൂമികൾ എന്നിവയായിരുന്നു ഓപ്ഷനുകളായി ഉണ്ടായിരുന്നത്.

ദേവരസാന്ത, അഞ്ച് വർഷം മുൻപാണ് ഈ ആചാരം ഞാൻ ആരംഭിച്ചത്. ഇതുവരെയുള്ളതിൽ വെച്ച് ഏറ്റവും നല്ലൊരു ആശയം ഇത്തവണ എനിക്കുണ്ട്. നിങ്ങളിൽ നൂറുപേരെ എല്ലാ ചെലവുകളും വഹിച്ചുകൊണ്ട് ഞാനൊരു ഹോളിഡേയ്ക്ക് അയക്കാൻ പോകുന്നു. എവിടേക്കാണെന്നത് തെരഞ്ഞെടുക്കാൻ നിങ്ങളെന്നെ സഹായിക്കാമോ’ എന്നാണ് വിജയ് ട്വീറ്റ് ചെയ്തത്.

ഇതിൽ 42 ശതമാനം പേരും വോട്ട് ചെയ്തത് ഇന്ത്യയിലെ മലനിരകൾക്കായിരുന്നു. വൈകാതെ സൗജന്യയാത്രയുടെ വിവരങ്ങളും താരം പങ്കിടുമെന്നാണ ആരാധകരുടെ പ്രതീക്ഷ. 31,000 ലേറെ ട്വിറ്റർ ഉപയോക്താക്കളാണ് വോട്ടിങ്ങിൽ പങ്കെടുത്തത്. ട്വീറ്റിന് 291,000 കാഴ്ചക്കാരേയും 38,000 ലൈക്കുകളും ലഭിച്ചു. സാമന്ത നായികയാവുന്ന കുഷിയാണ് വിജയ് ദേവരകൊണ്ടയുടേതായി വരാനിരിക്കുന്ന ചിത്രം.