നടി രംഭയും മക്കളും സഞ്ചരിച്ച കാർ അപകടത്തിൽപ്പെട്ടു. നടി തന്നെയാണ് അപകടവാർത്ത ഇൻസ്റ്റഗ്രാമിലൂടെ പങ്കുവെച്ചത്. അപകടത്തിൽ പരിക്കേറ്റ മകളെ ആശുപത്രിയിൽ പ്രവേശിപ്പിച്ചിരിക്കുകയാണ്. പരിക്ക് നിസാരമാണെന്നും നടി അറിയിക്കുന്നുണ്ട്. കാനഡയിൽ വെച്ചാണ് അപകടം നടന്നത്. രംഭയും മക്കളും അത്ഭുതകരമായാണ് വലിയ അപകടത്തിൽ നിന്നും കരകയറിയത്.
തകർന്ന കാറിന്റെ ചിത്രത്തോടൊപ്പമാണ് അപകട വിവരം രംഭ അറിയിച്ചത്. സ്‌കൂളിൽ നിന്നും കുട്ടികളെ തിരിച്ചുകൊണ്ടുപോകുന്ന വഴി കാറിൽ മറ്റൊരു കാർ വന്ന് ഇടിക്കുകയായിരുന്നു. മക്കളും മുത്തശ്ശിയുമാണ് രംഭയ്ക്ക് ഒപ്പം കാറിൽ ഉണ്ടായിരുന്നത്. എല്ലാവരും നിസാര പരിക്കുകൾ ആണെങ്കിലും സാഷ ആശുപത്രിയിൽ തുടരുകയാണെന്നും രംഭ അറിയിക്കുന്നു.
മോശം സമയം, മോശം ദിവസം എന്നും രംഭ കുറിച്ചിട്ടുണ്ട്. സഹപ്രവർത്തകരും ആരാധകരുമടക്കം നിരവധിപേരാണ് നടിക്ക് ആശ്വാസവാക്കുകളുമായി എത്തിയിട്ടുണ്ട്. 2011ലായിരുന്നു രംഭയും ഇന്ദ്രകുമാറും വിവാഹിതരാകുന്നത്. വിവാഹത്തോടെ സിനിമയിൽ നിന്നും ഇടവേള എടുക്കുകയായിരുന്നു താരം. രണ്ട് പെൺകുട്ടികളും ഒരു മകനുമാണ് താരത്തിനുള്ളത്.