കൊച്ചി: മറിമായത്തിലെ സുമേഷായെത്തി കുടുകുടെ ചിരിപ്പിച്ച നടന്‍ വിപി ഖാലിദിന്റെ വിയോഗത്തിന്റെ അപ്രതീക്ഷിത വിയോഗത്തിന്റെ ഞെട്ടലിലാണ് സിനിമാലോകം.
ലൊക്കേഷനില്‍ വച്ചുണ്ടായ ഹൃദയാഘാതമാണ് ഖാലിദിന്റെ ജീവനെടുത്തത്.
ജനപ്രിയ ടെലിവിഷന്‍ പരമ്പര മറിമായത്തിലെ അദ്ദേഹത്തിന്റെ സുമേഷ് എന്ന കഥാപാത്രം ഏറെ ശ്രദ്ധേയമായിരുന്നു. ഇപ്പോഴിതാ അദ്ദേഹത്തിന്റെ വിയോഗത്തില്‍ വേദന പങ്കുവെച്ചിരിക്കുകയാണ് നടി സ്നേഹ ശ്രീകുമാര്‍. അദ്ദേഹം അവസാനമായി മാറിമായത്തിന്റെ ഭാഗമായപ്പോള്‍ എടുത്ത ചിത്രവും പങ്കുവച്ചാണ് സ്‌നേഹയുടെ കുറിപ്പ്.
ഞങ്ങടെ സുമേഷേട്ടന് പോയി… മിനിഞ്ഞാന്ന് തൃപ്പൂണിത്തുറയിലെ ഞങ്ങടെ വീട്ടില്‍ വന്നു ശ്രീകുമാറിനേം കൂട്ടിയാണ് വൈക്കത്തു ജൂഡ് ആന്റണിയുടെ സിനിമയില്‍ അഭിനയിക്കാന്‍ പോയത്, അത് അവസാന കൂടിക്കാഴ്ച ആകുമെന്ന് കരുതിയില്ല..
ഇന്ന് രാവിലെ ശ്രീ വിളിച്ചു ഖാലിദിക്ക വീണു, ഹോസ്പിറ്റലില്‍ പോകുവാണെന്നു പറഞ്ഞപ്പോള്‍ ഞാന്‍ വേഗം റെഡി ആയി വൈക്കത്തേക്ക് പുറപ്പെടാന്‍. പക്ഷെ കുറച്ചു കഴിഞ്ഞപ്പോള്‍ തന്നെ ശ്രീ വിളിച്ചു ഖാലിദിക്ക പോയെന്നു പറഞ്ഞു…
രാവിലെ മുതല്‍ ഇത്രയും നേരം സത്യം ആവരുതെന്നു പ്രാര്‍ത്ഥിച്ചു, വിശ്വസിക്കാന്‍ കഴിയുന്നില്ലായിരുന്നു. ഞങ്ങടെ കാരണവര്‍, കൊച്ചിന്‍ നാഗേഷ്, സുമേഷേട്ടന് പോയികളഞ്ഞു… മറിമായം അവസാന ഷൂട്ടിംഗിന് എടുത്ത ഫോട്ടോയാണ് ഇത്… എന്നും അഭിനയത്തോട് പ്രണയമായിരുന്നു സുമേഷേട്ടന്…
വൈക്കത്ത് ടൊവിനോയുടെ പുതിയ ചിത്രത്തില്‍ അഭിനയിക്കുന്നതിനിടയിലാണ് അദ്ദേഹത്തിന്റെ വിയോഗം. ഭക്ഷണം കഴിച്ചശേഷം ശുചിമുറിയില്‍ പോയ ഇദ്ദേഹത്തെ കാണാതായതിനെ തുടര്‍ന്ന് അന്വേഷിച്ചെത്തിയപ്പോള്‍ ആണ് ശുചിമുറിയില്‍ മരിച്ചനിലയില്‍ കണ്ടത്.
തലയ്ക്ക് ചെറിയ പരിക്കും ഉണ്ടായിരുന്നു. വൈക്കം ഇന്തോ അമേരിക്കന്‍ ആശുപത്രിയിലാണ് മൃതദേഹം സൂക്ഷിച്ചിരിക്കുന്നത്. ഹൃദയാഘാതമാണ് മരണകാരണമെന്നാണ് ആശുപത്രി അധികൃതര്‍ അറിയിച്ചിരിക്കുന്നത്.
Discussion about this post