റിലീസ് ചെയ്ത അന്നു മുതല്‍ ഇന്നുവരെ സിനിമാ ആസ്വാദകരുടെ മനസില്‍ മായാതെ കിടക്കുന്ന ചിത്രമാണ് മണിച്ചിത്രത്താഴ്. ഏത് ജനറേഷനില്‍ ഉള്ളവര്‍ക്കും ആസ്വദിക്കാന്‍ പറ്റുമെന്നതാണ് ചിത്രത്തിന്റെ ഏറ്റവും വലിയ മേന്മ. കാലം ചെല്ലുംതോറും പഴക്കം കൂടിയ വീഞ്ഞ് പോലെയാണ് ഈ ചിത്രം. ഡോക്ടര്‍ സണ്ണിയും ഗംഗയും നകുലനും ശ്രീദേവിയുമൊക്കെ ഇന്നും പ്രേക്ഷക മനസില്‍ നിറഞ്ഞു നില്‍ക്കുന്ന കഥാപാത്രങ്ങളാണ്.
1993 ഡിസംബര്‍ 25നാണ് ഫാസിലിന്റെ സംവിധാനത്തില്‍ മണിച്ചിത്രത്താഴ് പുറത്തിറങ്ങിയത്. ചിത്രത്തിലെ പ്രകടനത്തിന് മികച്ച നടിക്കുള്ള ദേശീയപുരസ്‌കാരവും ശോഭനയ്ക്ക് ലഭിച്ചിരുന്നു. മണിച്ചിത്രത്താഴ് 25 മത്തെ വര്‍ഷത്തില്‍ എത്തിയിരിക്കുന്ന അവസരത്തില്‍ ആരാധകരോട് നന്ദിയും ഒപ്പം മാപ്പും പറഞ്ഞ് ശോഭന രംഗത്ത് എത്തിയിരിക്കുകയാണ്. ആരാധകരുടെ അന്വേഷണങ്ങള്‍ക്ക് മറുപടി പറയാന്‍ വൈകിയതാണ് താരം മാപ്പ് ചോദിച്ചത്. തന്റെ ഫേസ്ബുക്ക് പേജിലൂടെയാണ് ശോഭന മണിചിത്രത്താഴിനെക്കുറിച്ച് വാചാലയായത്. വര്‍ഷങ്ങളിത്ര കഴിഞ്ഞിട്ടും ആളുകള്‍ ചിത്രം മറക്കാതിരുന്നതും ഇപ്പോഴും അതിന്റെ പേരില്‍ അഭിനന്ദങ്ങള്‍ കിട്ടുന്നത് വലിയൊരു കാര്യമാണെന്ന് ശോഭന പറഞ്ഞു.
ചിത്രത്തെക്കുറിച്ച് ശോഭനയുടെ വാക്കുകള്‍…
എല്ലാ മീഡിയ സുഹൃത്തുക്കള്‍ക്കും എക്കാലത്തെയും എന്റെ പ്രിയ സിനിമയായ മണിച്ചിത്രത്താഴിന്റെ ഫാന്‍സിനും, ‘മാര്‍ഗ്ഗഴി’ എന്ന പെര്‍ഫോമന്‍സുമായി ഞാന്‍ ചെന്നൈയില്‍ തിരക്കിലാണ്, അതാണ് നിങ്ങളുടെ അന്വേഷണങ്ങള്‍ക്ക് മറുപടി തരാന്‍ കഴിയാതെ പോയത്. അതിന് ക്ഷമ ചോദിക്കുന്നു.
വര്‍ഷങ്ങളിത്ര കഴിഞ്ഞിട്ടും ആ സിനിമ ആളുകള്‍ മറന്നിട്ടില്ലെന്നതും കൂടുതല്‍ അഭിനന്ദനങ്ങള്‍ നേടുന്നതും വലിയൊരു കാര്യമാണ്. ശരിക്കും വിസ്മയകരമായി തോന്നുന്നു, എനിക്കു മാത്രമല്ല ചിത്രത്തിലെ മറ്റു ആര്‍ട്ടിസ്റ്റുകള്‍, സംവിധായകന്‍, ടെക്നീഷ്യന്‍മാര്‍ എന്നിവര്‍ക്കും സമാന അനുഭവം തന്നെയായിരിക്കുമെന്ന് ഞാന്‍ കരുതുന്നു. അവരോടെല്ലാം എന്റെ സ്നേഹവും ബഹുമാനവും അറിയിക്കുന്നുവെന്ന് ശോഭന ഫേസ്ബുക്കില്‍ കുറിച്ചു.
ഏറ്റവുമധികം ഭാഷകളിലേക്ക് റീമേക്ക് ചെയ്യപ്പെട്ട മലയാള ചിത്രമെന്ന വിശേഷണവും മണിചിത്രത്താഴിനുള്ളതാണ്. തമിഴ്, ഹിന്ദി, കന്നട, ബംഗാളി, ബോജ്പുരി അടക്കമുള്ള ഭാഷകളിലെല്ലാം ചിത്രം റീമേക്ക് ചെയ്തിട്ടുണ്ട്.
Discussion about this post