വിജയ്‌യും വിജയ് സേതുപതിയും പ്രധാന വേഷങ്ങളിലെത്തിയ മാസ്റ്റര്‍ സിനിമയുടെ തിയറ്റര്‍ റിലീസിന് പിന്നാലെ ഒടിടി റിലീസ് തിയതി പ്രഖ്യാപിച്ചു. പുതിയ ട്രെയിലര്‍ പുറത്തുവിട്ടു കൊണ്ടാണ് ചിത്രത്തിന്റെ ആമസോണ്‍ പ്രൈം റിലീസ് തിയതി അറിയിച്ചത്.
ജനുവരി 29നാണ് മാസ്റ്റര്‍ ആമസോണ്‍ പ്രൈമില്‍ റിലീസ് ചെയ്യുക. ചിത്രം തിയേറ്ററുകളിലെത്തി 17 ദിവസത്തിന് ശേഷമാണ് ഒടിടിയില്‍ റിലീസ് ചെയ്യുന്നത്. ആമസോണ്‍ പ്രൈമില്‍ സെന്‍സര്‍ ചെയ്യാത്ത മുഴുവന്‍ രൂപത്തിലാകും ചിത്രം പുറത്തിറക്കുകയെന്നാണ് ലഭിക്കുന്ന റിപ്പോര്‍ട്ടുകള്‍.
ലോകേഷ് കനകരാജ് സംവിധാനം ചെയ്ത മാസ്റ്റര്‍ പൊങ്കല്‍ റിലീസ് ആയി ജനുവരി 13-നാണ് തിയറ്ററുകളിലെത്തിയത്. നാല് ഭാഷകളിലാണ് വിജയ് പ്രൊഫസര്‍ വേഷത്തിലെത്തുന്ന മാസ്റ്റര്‍ പുറത്തിറങ്ങിയത്. തമിഴ്, ഹിന്ദി, തെലുഗു, കന്നഡ എന്നീ ഭാഷകളിലാണ് ചിത്രം പുറത്തിറങ്ങിയത്.
വിജയ് സേതുപതിയാണ് ചിത്രത്തിലെ വില്ലന്‍. മലയാളിയായ മാളവികാ മോഹനന്‍ ആണ് നായിക. അര്‍ജുന്‍ ദാസ്, ആന്‍ഡ്രിയ, ശന്തനു എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. സേവ്യര്‍ ബ്രിട്ടോയാണ് ദളപതി ചിത്രത്തിന്റെ നിര്‍മ്മാണം.
കോവിഡിനെ തുടര്‍ന്ന് അടച്ചിട്ട തീയറ്ററുകള്‍ തുറന്നത് മാസ്റ്റര്‍ പ്രദര്‍ശനത്തോടെയാണ്. കേരളത്തില്‍ ഉള്‍പ്പെടെ മികച്ച വരവേല്‍പാണ് ചിത്രത്തിനു ലഭിച്ചത്. റിലീസായി ദിവസങ്ങള്‍ക്കുള്ളില്‍ 100 കോടി ക്ലബിലെത്തിയ ചിത്രം ഇപ്പോള്‍ 220 കോടി രൂപ ആഗോളതലത്തില്‍ നേടിയെന്നാണ് റിപ്പോര്‍ട്ടുകള്‍.
Discussion about this post