മലയാളത്തിൽ അന്നുവരെ ഇറങ്ങിയ സൂപ്പർതാര സിനിമകളുടെയൊക്കെ റെക്കോർഡ് തകർത്താണ് ദൃശ്യം എന്ന സിനിമ ബോക്‌സ്ഓഫീസിൽ നിറഞ്ഞോടിയത്. കുടുംബപ്രേക്ഷകരേയും ത്രില്ലർ സിനിമ ആരാധകരേയും ഒരുപോലെ ആകർഷിച്ച ദൃശ്യം നടി അൻസിബ ഹസനും അഭിനയജീവിതത്തിലെ വലിയ നേട്ടമായിരുന്നു.
ദൃശ്യം എന്ന ഒറ്റ സിനിമയിലൂടെ തന്നെ അൻസിബയെ പ്രേക്ഷകർ പ്രിയങ്കരിയായി ഏറ്റെടുത്തു. അന്ന് ദൃശ്യം ഹിറ്റായപ്പോൾ തന്റെ സിനിമാലോകത്തെ തലവര മാറുമെന്ന് അൻസിബയും ചിന്തിച്ചു. എന്നാൽ ദൃശ്യത്തിന് ശേഷം അതുപോലെ നല്ലൊരു കഥാപാത്രം തന്നെ തേടി വന്നില്ലെന്ന് അൻസിബ പറയുന്നു.
പിന്നീട് നല്ല ചിത്രങ്ങൾ ലഭിക്കാത്തതിനെ തുടർന്ന് കഴിഞ്ഞ നാല് വർഷത്തിലേറെയായി സിനിമയിൽ നിന്ന് വിട്ടു നിൽക്കുകയായിരുന്ന അൻസിബ സിനിമയിലെ അഭിനയം എന്ന മോഹം തന്നെ ഉപേക്ഷിക്കാൻ തീരുമാനമെടുത്തിരുന്നു.
പക്ഷെ, വീണ്ടും തലവര മാറ്റാനായി ജീത്തു ജോസഫ് സമീപിക്കുകയായിരുന്നു എന്ന് അൻസിബ പറയുന്നു. സിനിമ ഉപേക്ഷിക്കാമെന്ന് കരുതിയിരുന്ന അതേ സമയത്താണ് ദൃശ്യത്തിന്റെ രണ്ടാം ഭാഗമൊരുക്കുന്നതായി ജീത്തു ജോസഫ് പ്രഖ്യാപിച്ചത്. വീണ്ടും ജോർജുകുട്ടിയുടെ മകളാവാൻ ക്ഷണിക്കുകയും ചെയ്തു. ഒരു പുനർജന്മം പോലെ വന്ന സിനിമയാണ് ദൃശ്യം 2- അൻസിബ പറയുന്നു.