നടിമാര്‍ക്കും മറ്റ് സ്ത്രീകള്‍ക്കും താന്‍ ആണെന്ന പേരില്‍ വ്യാജകോളുകള്‍ വരുന്നുണ്ടെന്ന് സംവിധായകന്‍ അല്‍ഫോന്‍സ് പുത്രന്‍. ഫേസ്ബുക്ക് പോസ്റ്റിലൂടെ ആണ് അദ്ദേഹം വ്യാജ കോളുകളെ കുറിച്ചുള്ള മുന്നറിയിപ്പ് നല്‍കിയത്. സംഭവത്തില്‍ പൊലീസില്‍ പരാതി നല്‍കിയിട്ടുണ്ടെന്നും അല്‍ഫോന്‍സ് പുത്രന്‍ പറഞ്ഞു.
9746066514, 9766876651 എന്നീ ഫോണ്‍ നമ്പറുകളില്‍ നിന്നാണ് കോള്‍ വരുന്നതെന്നും ഇത്തരത്തില്‍ കോള്‍ വന്നാല്‍ വ്യക്തിഗത വിവരങ്ങളോ ഫോട്ടോകളോ വീഡിയോകളോ കൈമാറരുതെന്നും അദ്ദേഹം കൂട്ടിച്ചേര്‍ത്തു.
‘9746066514, 9766876651 എന്നീ ഫോണ്‍ നമ്പറുകള്‍ ശ്രദ്ധിക്കുക. ഈ നമ്പറുകളില്‍ നിന്നും സിനിമാ രംഗത്തെ നടിമാര്‍ക്കും മറ്റ് സ്ത്രീകള്‍ക്കും ഞാന്‍ ആണെന്ന പേരില്‍ വ്യാജകോളുകള്‍ വരുന്നുണ്ട്. ഞാന്‍ ഈ നമ്പറിലേക്ക് വിളിച്ചപ്പോള്‍ ഫോണ്‍ എടുത്തയാള്‍ അവകാശപ്പെട്ടത് അല്‍ഫോന്‍സ് പുത്രന്‍ ആണെന്നാണ്. അതുകൊണ്ട് തന്നെ മുകളില്‍ പറഞ്ഞ നമ്പറുകളില്‍ നിന്ന് സമാന കോളുകള്‍ ലഭിക്കുകയാണെങ്കില്‍ ദയവായി ശ്രദ്ധിക്കുക. നിങ്ങളെ കബളിപ്പിക്കാന്‍ ആ വ്യക്തിയെ അനുവദിക്കരുത്. നിങ്ങള്‍ക്ക് ഇതുപോലുള്ള എന്തെങ്കിലും കോള്‍ ലഭിക്കുകയാണെങ്കില്‍, വ്യക്തിഗത വിവരങ്ങളോ ഫോട്ടോകളോ വീഡിയോകളോ കൈമാറരുത്. ഇത് ഒരു തട്ടിപ്പാണെന്ന് മനസ്സിലാക്കുക’ എന്നാണ് അല്‍ഫോന്‍സ് പുത്രന്‍ ഫേസ്ബുക്കില്‍ കുറിച്ചത്.
