സിനിമാ ചിത്രീകരണത്തിനിടെ പരിക്കേറ്റ് വീട്ടില്‍ വിശ്രമത്തിലായിരുന്ന നടന്‍ ടൊവിനോ തോമസ് ലൊക്കേഷനില്‍ തിരിച്ചെത്തി. ഒരു ഇടവേളയ്ക്ക് ശേഷം തിരിച്ചെത്തിയ താരത്തെ അണിയറ പ്രവര്‍ത്തകര്‍ മധുരം നല്‍കിയാണ് സ്വീകരിച്ചത്. അഭിനേതാക്കളും അണിയറപ്രവര്‍ത്തകരും ഒരുമിച്ച് കേക്ക് മുറിച്ച് മധുരം നല്‍കിക്കൊണ്ടാണ് സ്വീകരണം ഒരുക്കിയത്. സൂപ്പര്‍ഹിറ്റ് ചിത്രം ഉയരെക്കു ശേഷം മനു അശോകനും ബോബി സഞ്ജയ് ടീമും വീണ്ടും ഒന്നിക്കുന്ന ചിത്രമാണ് കാണെക്കാണെ.
മറ്റൊരു ചിത്രത്തിന്റെ ഷൂട്ടിംഗ് സെറ്റില്‍ വച്ചാണ് ടൊവീനോയ്ക്ക് പരിക്കേറ്റത്. കടുത്ത വയറുവേദനയെത്തുടര്‍ന്ന് കൊച്ചിയിലെ സ്വകാര്യ ആശുപത്രിയില്‍ പ്രവേശിപ്പിച്ചിരുന്നു. പരിശോധനയില്‍ ആന്തരികാവയവത്തില്‍ രക്തം കണ്ടെത്തിയിരുന്നു. വിദഗ്ധ ചികിത്സയ്ക്ക് ശേഷം വീട്ടില്‍ വിശ്രമത്തിലായിരുന്ന താരമാണ് വീണ്ടും സിനിമ ലൊക്കേഷനില്‍ എത്തിയത്.
ടൊവീനോ തോമസിനും ഐശ്വര്യ ലക്ഷ്മിക്കും ഒപ്പം സുരാജ് വെഞ്ഞാറമൂടും, ശ്രുതി രാമചന്ദ്രനും കേന്ദ്ര കഥാപാത്രങ്ങളെ അവതരിപ്പിക്കുന്ന ചിത്രമാണ് കാണെക്കാണെ.
