മലയാള സിനിമയിലെ മിന്നും താരം പൃഥ്വിരാജിന് ഇന്ന് ജന്മദിനം. നിരവധി പേരാണ് താരത്തിന് ജന്മദിനാശംസകള്‍ നേര്‍ന്നത്. പിറന്നാളിന് പൃഥ്വിരാജിന് പാട്ടു സമ്മാനമൊരുക്കിയിരിക്കുകയാണ് വൈറല്‍ ഗായിക നഞ്ചമ്മ. ഇക്കഴിഞ്ഞ ദിവസമാണ് ഗായികയുടെ പുതിയ പാട്ട് പുറത്തിറക്കിയത്.
‘എടമുറുകണ് മദ്ദളം കൊട്ടണ്’ എന്ന തനിനാടന്‍ ശീലുള്ള ഗാനമാണിത്. ബിജു. കെ.ടി വരികളൊരുക്കിയ പാട്ടിന് ഈണം കൊടുത്തത് സജിത് ശങ്കര്‍ ആണ്. ബിജുവും നഞ്ചമ്മയും ചേര്‍ന്നാണ് ഗാനം ആലപിച്ചത്. ഇരുവരും ഒരുമിച്ചുള്ള ആമുഖ സംഭാഷണത്തോടെയാണ് വിഡിയോയുടെ തുടക്കം.
സുന്ദരവും ലളിതവുമായ രീതിയിലാണ് തനിനാടന്‍ ടച്ചുള്ള ഈ പാട്ടൊരുക്കിയത്. പൃഥ്വിരാജിനെ ‘രാജുവേട്ടാ’ എന്ന സ്‌നേഹപൂര്‍വമുള്ള അഭിസംബോധനയും താളം മുറിയാതെയുള്ള ആലാപനവും പാട്ടിന് ഏറെ ആസ്വാദകരെ നേടിക്കൊടുത്തു. മികച്ച പ്രതികരണമാണ് സമൂഹമാധ്യമങ്ങളില്‍ നിന്നും ലഭിക്കുന്നത്.
ഗാനരംഗത്തിലെ നഞ്ചമ്മയുടെ നിഷ്‌കളങ്കമായ ചിരിയും ആസ്വാദകര്‍ക്കിടയില്‍ ചര്‍ച്ചയായി. അട്ടപ്പാടിയുടെ തനത് സൗന്ദര്യക്കാഴ്ചകളും പാട്ടില്‍ ഉള്‍പ്പെടുത്തിയിട്ടുണ്ട്. പ്രവീണ്‍ കുമാര്‍ പി.കെ ആണ് ചിത്രീകരണവും എഡിറ്റിങ്ങും നിര്‍വഹിച്ചത്. അന്തരിച്ച സംവിധായകന്‍ സച്ചിയുടെ അവസാന ചിത്രമായ അയ്യപ്പനും കോശിയിലൂടെയാണ് അട്ടപ്പാടി സ്വദേശിയായ നഞ്ചമ്മ മലയാളികള്‍ക്കു സുപരിചിതയായത്.
Discussion about this post