മുംബൈ: സംവിധായകൻ അനുരാഗ് കശ്യപിനെതിരെ ആരോപണവുമായി രംഗത്തെത്തിയ പായൽ ഘോഷിന് എതിരെ നിയമ നടപടിക്ക് ഒരുങ്ങി നടി റിച്ച ഛദ്ദ. വിവാദത്തിലേക്ക് വലിച്ചിഴച്ചതിനാണ് പായൽ ഘോഷിനെതിരെ നിയമനടപടി സ്വീകരിക്കുമെന്ന് നടി റിച്ച ഛദ്ദ അറിയിച്ചത്. റിച്ചയടക്കമുള്ള നടിമാർ തന്റെ ഇംഗിതത്തിനു വഴങ്ങിയെന്ന് അനുരാഗ് തന്നോടു പറഞ്ഞതായി പായൽ കഴിഞ്ഞ ദിവസം വെളിപ്പെടുത്തിയിരുന്നു. ഇതിന് പിന്നാലെയാണ് റിച്ചയുടെ നടപടി. റിച്ചയ്ക്ക് എല്ലാ പിന്തുണയും നൽകുന്നെന്ന് അറിയിച്ച് താരത്തിന്റെ ഭാവിവരനായ നടൻ അലി ഫസലും രംഗത്തെത്തിയിട്ടുണ്ട്.
അതേസമയം, ലൈംഗിക പീഡനാരോപണം നേരിടുന്ന അനുരാഗ് കശ്യപിന് സിനിമാരംഗത്ത് നിന്നും പിന്തുണ വർധിക്കുകയാണ്. കൂടുതൽ നടിമാർ പിന്തുണച്ചെത്തി. നടി രാധിക ആപ്‌തെ, മുൻഭാര്യയും നടിയുമായ കൽക്കി കൊച്‌ലിൻ എന്നിവർ സംവിധായകനെ പിന്തുണച്ച് രംഗത്തെത്തി. അനുരാഗ് ആരുടെയെങ്കിലും മനസ്സു വേദനിപ്പിച്ചതായി തന്റെ അറിവിൽ ഇല്ലെന്ന് മുതിർന്ന സംവിധായകൻ രാംഗോപാൽ വർമ പറഞ്ഞു.
നടിമാരായ തപ്‌സി പന്നു, സുർവീൻ ചൗള എന്നിവർ കഴിഞ്ഞ ദിവസം സംവിധായകനെ പിന്തുണച്ചിരുന്നു.
Discussion about this post