നടന്‍ വിനായകന്‍ സംവിധായകനാവുന്നു. പാര്‍ട്ടി എന്ന് പേരിട്ടിരിക്കുന്ന സിനിമയുടെ രചനയും വിനായകന്‍ തന്നെയാണ്. ഒപിഎം സിനിമാസിന്റെ ബാനറില്‍ ആഷിക് അബുവും റിമ കല്ലിങ്കലും ചേര്‍ന്നാണ് ചിത്രം നിര്‍മ്മിക്കുന്നത്. ആഷിക് അബു ഫേസ്ബുക്കിലൂടെയാണ് ഇക്കാര്യം അറിയിച്ചത്. ‘നടനായി സിനിമയില്‍ 25 വര്‍ഷം പൂര്‍ത്തിയാക്കുന്ന നമ്മുടെ വിനായകന്‍ അടുത്ത വര്‍ഷം ആദ്യ സിനിമ എഴുതിസംവിധാനം ചെയ്യും. ‘പാര്‍ട്ടി ‘ അടുത്ത വര്‍ഷം’-ആഷിക് അബു കുറിച്ചു.
ഡാന്‍സര്‍ ആയിരുന്ന വിനായകന്‍ തമ്പി കണ്ണന്താനത്തിന്റെ സംവിധാനത്തില്‍ 1995ല്‍ പുറത്തെത്തിയ ‘മാന്ത്രിക’ത്തിലൂടെയാണ് സിനിമയിലേക്ക് എത്തുന്നത്. മലയാളത്തിന് പുറമെ തമിഴ്, തെലുങ്ക്, ഹിന്ദി ചിത്രങ്ങളിലും അദ്ദേഹം അഭിനയിച്ചു. അറുപതോളം സിനിമകളില്‍ അഭിനയിച്ചു. രാജീവ് രവിയുടെ ‘കമ്മട്ടിപ്പാട’ത്തിലെ ‘ഗംഗ’ എന്ന കഥാപാത്രം മികച്ച നടനുള്ള സംസ്ഥാന ചലച്ചിത്രപുരസ്‌കാരം നേടിക്കൊടുത്തു.
കമ്മട്ടിപ്പാടത്തിലെ ഒരു ഗാനത്തിന്റെ സംഗീതസംവിധാനവും വിനായകന്‍ നിര്‍വഹിച്ചിരുന്നു. ട്രാന്‍സായിരുന്നു അവസാനം തീയറ്ററില്‍ എത്തിയ ചിത്രം. ട്രാന്‍സിലും വിനായകന്‍ പാട്ട് ഒരുക്കിയിരുന്നു.
ലീല സന്തോഷ് സംവിധാനം ചെയ്യുന്ന ‘കരിന്തണ്ടന്‍’ ആണ് വിനായകന്‍ നായകനാകുന്ന ഇനി തുടങ്ങാനിരിക്കുന്ന സിനിമ.
Discussion about this post