തിരുവോണ ദിനത്തില്‍ ടെലിവിഷനിലൂടെ റിലീസ് ചെയ്ത തന്റെ ഏറ്റവും പുതിയ ചിത്രമായ
‘കിലോമീറ്റേഴ്‌സ് ആന്‍ഡ് കിലോമീറ്റേഴ്‌സ്’ എന്ന ചിത്രത്തിന്റെ ബാര്‍ക് റേറ്റിംഗ് പുറത്തുവിട്ട് ടൊവീനോ തോമസ്. ഫേസ്ബുക്കിലൂടെയാണ് താരം ഇത് പുറത്തുവിട്ടത്.
8.11 ലക്ഷം ഇംപ്രഷനുകള്‍ ലഭിച്ച ചിത്രത്തിന് ലഭിച്ച റീച്ച് 74 ലക്ഷം ആണ്. ഇന്ത്യയില്‍ വിനോദ സഞ്ചാരത്തിനായെത്തിയ ഒരു അമേരിക്കക്കാരി പെണ്‍കുട്ടിയുമായി ഒരു മലയാളി യുവാവ് നടത്തുന്ന യാത്രയും തുടര്‍ന്നുള്ള സംഭവങ്ങളുമായിരുന്നു ചിത്രത്തിന്റെ പ്രമേയം.
അമേരിക്കന്‍ നടിയായ ഇന്ത്യ ജാര്‍വിസ് ആയിരുന്നു ചിത്രത്തിലെ നായിക. ജോജു ജോര്‍ജ്ജ്, സിദ്ധാര്‍ഥ് ശിവ, ബേസില്‍ ജോസഫ് തുടങ്ങിയവരായിരുന്നു ചിത്രത്തിലെ മറ്റ് പ്രധാന താരങ്ങള്‍. രണ്ട് പെണ്‍കുട്ടികള്‍, കുഞ്ഞു ദൈവം എന്നീ ചിത്രങ്ങള്‍ ഒരുക്കിയിട്ടുള്ള ജിയോ ബേബിയാണ് ചിത്രം സംവിധാനം ചെയ്തിരിക്കുന്നത്. റംഷി ഷി അഹമ്മദ്, ആന്റോ ജോസഫ്, ടൊവീനോ തോമസ്, സിനു സിദ്ധാര്‍ഥ് എന്നിവര്‍ ചേര്‍ന്നാണ് ചിത്രം നിര്‍മ്മിച്ചിരിക്കുന്നത്.
