ന്യൂഡല്ഹി: നിരവധി പേരുടെ ജീവനെടുത്ത കൊറോണയോട് പൊരുതുകയാണ് ലോകം ഒന്നടങ്കം ഒറ്റക്കെട്ടായി. ജീവന് പോലും പണയം വച്ച് നമുക്ക് കാവലിരുന്ന് സംരക്ഷിക്കുന്ന ആരോഗ്യ പ്രവര്ത്തകരെ ആര്ക്കും മറക്കാനാകില്ല. പിപിഇ കിറ്റ് ധരിച്ച് ജോലിചെയ്യുന്ന ആരോഗ്യ പ്രവര്ത്തകരുടെ ബുദ്ധിമുട്ടുകളെ കുറിച്ച് മുന്പും വാര്ത്തകള് പുറത്തു വന്നിരുന്നു.
പിപിഇ കിറ്റിനുള്ളിലെ അസഹനീയമായ ചൂട് സഹിച്ച് മണിക്കൂറുകളോളമാണ് നമ്മുടെ ജീവനുവേണ്ടി അവര് പൊരുതുന്നത്. എന്നാല് ആരോഗ്യപ്രവര്ത്തകരുടെ ഇത്തരം പ്രവര്ത്തനങ്ങളെ നിസാരവത്കരിക്കുന്ന രീതിയില് പിപിഇ കിറ്റ് ധരിച്ച് പിറന്നാള് പാര്ട്ടി നടത്തുന്ന ഒരു നടിയുടെ ചിത്രങ്ങളാണ് ഇപ്പോള് സമൂഹമാധ്യമങ്ങളില് വൈറലാകുന്നത്.
പഞ്ചാബി നടിയായ പരുള് ഗുലാട്ടിയാണ് പിപിഇ കിറ്റ് ധരിച്ച് പിറന്നാള് പാര്ട്ടി നടത്തിയത്. ഇതായിരുന്നു പിറന്നാള് വസ്ത്രത്തിന്റെ തീം എന്നും പരുള് പറയുന്നുണ്ട്. നടിയുടെ സുഹൃത്തുക്കളും പിപിഇ കിറ്റ് ധരിച്ചിട്ടുണ്ട്. തീം അനുസരിച്ചുള്ള വസ്ത്രം ധരിച്ചെത്തിയ എല്ലാവര്ക്കും നന്ദിയുണ്ടെന്നും പരുള് പറയുന്നു.
ചിത്രം താരം തന്നെയാണ് സോഷ്യല്മീഡിയയില് പങ്കുവെച്ചത്. ഇത് നിമിഷങ്ങള്ക്കകം വൈറലായി. ചിത്രം വൈറലായതോടെ വിവിധ കോണുകളില് നിന്നും പരുളിനെതിരെ വിമര്ശനങ്ങളും എത്തി. പിപിഇ കിറ്റുകള് ഇങ്ങനെ പാഴാക്കണോ? ആരോഗ്യ പ്രവര്ത്തകര്ക്ക് നല്കാമായിരുന്നില്ലേ….? സ്വന്തം പ്രിവിലേജിനെ പരുള് ദുരുപയോഗപ്പെടുത്തുകയാണ് എന്നിങ്ങനെയാണ് പലരുടെയും കമന്റുകള്. ഇത് ഫാഷന് സെന്സ് വെളിപ്പെടുത്താനുള്ളതല്ലെന്നും പലരും അഭിപ്രായപ്പെടുന്നു.
Discussion about this post