കഴിഞ്ഞ കുറച്ചു വര്ഷങ്ങളായി ബോളിവുഡ്, മലയാളം ഉള്പ്പെടെ സിനിമ മേഖലയിലുള്ള നിരവധി ഇന്ത്യന് നടീനടന്മാരാണ് ജീവിതത്തില്നിന്ന് ഒളിച്ചോടിയത്. പലരുടെയും മരണവാര്ത്ത രാജ്യത്തെ ഒന്നടങ്കം ഞെട്ടിച്ച സംഭവമായി മാറി.
നടന് സുശാന്ത് സിങ് രജ്പുതിന്റെ ആത്മഹത്യ അത്തരത്തിലുള്ള ഒന്നാണ്. സുശാന്തിന്റെ മരണം ബോളിവുഡിനെമാത്രമല്ല, ആരാധക വൃന്ദത്തെയും ഒരുപോലെ ഞെട്ടിച്ചിരിക്കുകയാണ്. ഒരു മാസത്തിനിടെ ബോളിവുഡിനെ ഞെട്ടിച്ച് രണ്ടാമത്തെ മരണമാണിത്. ‘ക്രൈം പട്രോള്’ നടി പ്രേക്ഷ മേത്തയുടേതാണ് ആദ്യത്തേത്. ഇന്ഡോറിലെ വീട്ടില് വെച്ചാണ് പ്രേക്ഷ ജീവിതം അവസാനിപ്പിച്ചത്.
ബോളിവുഡില് വേറെയുമുണ്ട് ഇന്നും ആരാധകര്ക്ക് അവിശ്വസനീയമായ താരങ്ങളുടെ വിയോഗം. കുശാല് പഞ്ചാബി, നിതിന് കപൂര്, പ്രത്യുഷ ബാനര്ജി, ജിയ ഖാന് തുടങ്ങിയവര് ഇന്ന് ലോകത്തില്ലെന്ന് പലര്ക്കും വിശ്വസിക്കാന് കഴിയാത്തതാണ്. തമിഴ്നടന്മാരായ, കുനാല് സിങ്, സായി പ്രശാന്ത്, നടി മോണല് നേവല്, തെലുങ്ക് നടന്മാരായ രംഗനാഥ്, ഉദയ് കിരണ് എന്നിവരും ലോകത്ത് നിന്നും വിടപറഞ്ഞു.
മലയാള സിനിമയിലുമുണ്ട് ഇത്തരത്തിലുള്ള തീരാ നഷ്ടങ്ങള്. ശ്രീനാഥ്, സന്തോഷ് ജോഗി, മയൂരി, സില്ക്ക് സ്മിത എന്നിവരുടെയും ആത്മഹത്യ ആരാധകരെ ഏറെ ഞെട്ടിച്ചിരുന്നു. ഇന്ത്യന് സിനിമാലോകത്തെ ഈ താരങ്ങളില് പലരുടെയും മരണത്തിന് കാരണം ഇന്നും അജ്ഞാതമാണ്.
Discussion about this post