‘മീ ടൂ’ ക്യാംപെയ്‌നിലൂടെ തമിഴ് കവിയും ഗാനരചയിതാവുമായ വൈരമുത്തുവിനെതിരെ ലൈംഗികാരോപണം നടത്തിയതിന് തമിഴകം അവസരം നിഷേധിച്ച ഗായിക ചിന്മയിക്ക് അവസരം നല്‍കി മലയാള സിനിമാലോകം. പൃഥ്വിരാജ് പ്രധാന വേഷത്തിലെത്തുന്ന ആടുജീവിതത്തിലാണ് ചിന്മയി പാടുന്നത്. സംഗീത സംവിധായകന്‍ എആര്‍ റഹ്മാന്‍ തന്നെ ഇക്കാര്യം അറിയിച്ചതായി ചിന്മയി സമൂഹമാധ്യമങ്ങളില്‍ കുറിച്ചു.
Since Rahman sir said it himself, safe to say I have sung a beautiful song in Mr. Blessy’s film. https://t.co/W18PFxAPIx
— Chinmayi Sripaada (@Chinmayi) December 1, 2018
സ്വിറ്റ്‌സര്‍ലന്റില്‍ വെച്ച് ഒരു പരിപാടിക്ക് ശേഷം വൈരമുത്തുമായി സഹകരിക്കാന്‍ പരിപാടിയുടെ സംഘാടകന്‍ ആവശ്യപ്പെട്ടുവെന്നാണ് മീ ടൂവിലൂടെ ചിന്മയി വെളിപ്പെടുത്തിയത്. ട്വിറ്ററിലൂടെയായിരുന്നു ചിന്മയി ഈ വിവരം ലോകത്തെ അറിയിച്ചത്.
ഇതേ തുടര്‍ന്ന് തമിഴ് സിനിമാ ലോകം ചിന്‍മയിക്കെതിരെ തിരിഞ്ഞിരുന്നു. ഡബ്ബിങ്ങ് ആര്‍ട്ടിസ്റ്റ് യൂണിയനില്‍ നിന്നും ഇതിന്റെ പേരില്‍ ചിന്‍മയിയെ പുറത്താക്കിയിരുന്നു. തനിക്ക് സിനിമയില്‍ അവസരങ്ങള്‍ നിഷേധിക്കുകയാണെന്ന ചിന്മയിയുടെ വെളിപ്പെടുത്തലിനു പിന്നാലെയാണ് ഇന്നലെ എആര്‍ റഹ്മാന്‍ താന്‍ സംഗീത സംവിധാനം നിര്‍വ്വഹിക്കുന്ന മലയാള ചിത്രം ആടുജീവിതത്തില്‍ ചിന്മയി ഗാനം ആലപിച്ചിരിക്കുന്നതായി അറിയിച്ചത്. ഒരു മാധ്യമത്തിനു നല്‍കിയ അഭിമുഖത്തിലാണ് റഹ്മാന്‍ ഇക്കാര്യം വെളിപ്പെടുത്തിയത്.
ബെന്യാമിന്‍ എഴുതിയ നോവലിനെ ആസ്പദമാക്കി ബ്ലെസ്സി സംവിധാനം ചെയ്യുന്ന ചിത്രമാണ് ആടുജീവിതം. ചിത്രത്തില്‍ പൃഥ്വിരാജാണ് പ്രധാന വേഷത്തില്‍ എത്തുന്നത്.