തങ്ങളുടെ ഇരുപത്തിനാലാം വിവാഹ വാര്‍ഷികദിനത്തില്‍ ഭാര്യ ആനിയെ കുറിച്ച് ഷാജി കൈലാസ് സോഷ്യല്‍ മീഡിയയില്‍ പങ്കുവെച്ച ഹൃദയസ്പര്‍ശിയായ കുറിപ്പാണ് ഇപ്പോള്‍ വൈറലായിരിക്കുന്നത്. നേരത്തേ ആനി അവതാരകയായി എത്തിയ പരിപാടിയില്‍ നടത്തിയ ചില പ്രസ്താവനകള്‍ സ്ത്രീവിരുദ്ധവും പിന്തിരിപ്പനുമാണെന്ന് സോഷ്യല്‍ മീഡിയയില്‍ ആക്ഷേപം ഉയര്‍ന്നിരുന്നു.
നടിമാരായ നവ്യ നായര്‍, നിമിഷ സജയന്‍ തുടങ്ങിയവരുമായുള്ള സംഭാഷണങ്ങളിലെ ഭാഗങ്ങള്‍ വച്ച് ഒട്ടേറെ ട്രോളുകളും പുറത്തിറങ്ങിയിരുന്നു. എന്നാല്‍ താന്‍ പറഞ്ഞ പലതും വളച്ചൊടിക്കപ്പെടുകയായിരുന്നെന്നും മുഴുവന്‍ അഭിമുഖവും കാണാത്തവരാണ് ആക്ഷേപങ്ങളുമായി എത്തിയതെന്നുമായിരുന്നു ആനി ഇതിനെ കുറിച്ച പ്രതികരിച്ചത്.
ഇപ്പോഴിതാ ആനിയുടെ ആ അഭിപ്രായത്തെ പിന്താങ്ങുകയാണ് ഭര്‍ത്താവും സംവിധായകനുമായ ഷാജി കൈലാസ്. ‘വളച്ചൊടിക്കപ്പെട്ട പലതിനും മുന്നില്‍ അവള്‍ തളര്‍ന്നേക്കാം,സങ്കടപ്പെട്ടേക്കാം,പക്ഷേ പതറാതെ തളരാതെ അവള്‍ക്ക് കരുത്തായി എന്നും ഞാന്‍ കൂടെയുണ്ടാകും’ എന്നാണ് ഷാജി കൈലാസ് കുറിച്ചത്. ഒരു പുല്‍നാമ്പിനെ പോലും വേദനിപ്പിക്കുവാന്‍ ആഗ്രഹിക്കാത്ത ആനിയെ സ്വന്തമാക്കിയ എന്നെ സംബന്ധിച്ചിടത്തോളം ഈ ലോകത്തിലെ ഏറ്റവും വലിയ ഭാഗ്യവാന്‍ ഞാന്‍ തന്നെയാണെന്നും ഷാജി കൈലാസ് കൂട്ടിച്ചേര്‍ത്തു.
ഷാജി കൈലാസിന്റെ ഫേസ്ബുക്ക് പോസ്റ്റിന്റെ പൂര്‍ണ്ണരൂപം,
ഇണക്കങ്ങളും പിണക്കങ്ങളും നിറഞ്ഞ മനോഹരമായ 24 വര്‍ഷങ്ങള്‍. ഞാനും എന്റെ ആനിയും ഒന്നിച്ചുള്ള മനോഹരമായ യാത്ര തുടരുകയാണ്.പരസ്പര ബഹുമാനത്തോടും സ്‌നേഹത്തോടും തുല്യതയോടും കൂടിയുള്ള ഈ യാത്രയില്‍ കൂട്ടും കരുത്തുമായി നില്‍ക്കുന്ന ഏവര്‍ക്കും ഒത്തിരിയേറെ നന്ദി.
ഞാനീ ലോകത്ത് ഏറ്റവുമധികം ബഹുമാനിക്കുന്ന, ഒരു പുല്‍നാമ്പിനെ പോലും വേദനിപ്പിക്കുവാന്‍ ആഗ്രഹിക്കാത്ത ആനിയെ സ്വന്തമാക്കിയ എന്നെ സംബന്ധിച്ചിടത്തോളം ഈ ലോകത്തിലെ ഏറ്റവും വലിയ ഭാഗ്യവാന്‍ ഞാന്‍ തന്നെയാണ്. സന്തോഷങ്ങളും പരിഭവങ്ങളും പങ്ക് വെക്കുവാന്‍ അമ്മ അരികില്ലാത്ത ആനിക്ക് ഞാന്‍ ഒരു അമ്മയാണ്.അവളുടെ എല്ലാമാണ്.
വളച്ചൊടിക്കപ്പെട്ട പലതിനും മുന്നില്‍ അവള്‍ തളര്‍ന്നേക്കാം.സങ്കടപ്പെട്ടേക്കാം.പക്ഷേ പതറാതെ തളരാതെ അവള്‍ക്ക് കരുത്തായി ഇന്നും എന്നും ഞാന്‍ കൂടെയുണ്ടാകും.ലോകം മുഴുവന്‍ വിഷമിക്കുന്ന ഈ ഒരു വേളയില്‍ ഞങ്ങള്‍ക്കും ആഘോഷങ്ങള്‍ ഇല്ല.വേഗം ലോകം മുഴുവന്‍ സുഖം പ്രാപിക്കട്ടെ.എല്ലാവര്‍ക്കും നന്മയും ആരോഗ്യവും നേരുന്നൂ…
Discussion about this post