സോഷ്യല്‍മീഡിയയില്‍ സജീവമായ സിനിമാതാരമാണ് പൂര്‍ണിമ ഇന്ദ്രജിത്. കുടുംബ വിശേഷങ്ങളും ഫാഷന്‍ വിശേഷങ്ങളും ബിസിനസ് വിശേഷങ്ങളുമെല്ലാം താരം സോഷ്യല്‍മീഡിയയില്‍ പങ്കുവെയ്ക്കാറുണ്ട്. പൂര്‍ണിമയുടെ ഒരു ഫേസ്ബുക്ക് പോസ്റ്റും അതിന് ഭര്‍തൃമാതാവായ മല്ലിക സുകുമാരന്‍ നല്‍കിയ കമന്റുമാണ് ഇപ്പോള്‍ സോഷ്യല്‍മീഡിയയില്‍ വൈറലായിക്കൊണ്ടിരിക്കുന്നത്.
തന്റെ ഇളയമകള്‍ നക്ഷത്രയെ ചേര്‍ത്തുനിര്‍ത്തി ഉമ്മകൊടുക്കുന്ന ഒരു ചിത്രമാണ് പൂര്‍ണിമ ഫേസ്ബുക്കില്‍ പങ്കുവെച്ചിരിക്കുന്നത്. ‘അടുപ്പം സ്വാതന്ത്ര്യത്തെ ഇല്ലാതാക്കുന്നില്ല. അത് വളരുകയാണ്. നിങ്ങള്‍ കുഞ്ഞുങ്ങളെ ചേര്‍ത്തുപിടിക്കുക…എന്തു തന്നെ ആയാലും നിങ്ങള്‍ അവരെ എത്രമാത്രം സ്നേഹിക്കുന്നുവെന്ന് അവരോട് പറയുക’യെന്നും ചിത്രം പങ്കുവെച്ച് പൂര്‍ണിമ ഫേസ്ബുക്കില്‍ കുറിച്ചു.
ഈ പോസ്റ്റിന് താഴെയാണ് അമ്മായിയമ്മ മല്ലിക സുകുമാരന്‍ കമന്റ് ചെയ്തിരിക്കുന്നത്. ”സത്യം.. അമ്മക്കും രണ്ട് ബേബീസ് ഉണ്ട്. മോള്‍ പറഞ്ഞതു പോലെയൊക്കെ ഒന്നു ചെയ്യണമെന്നുണ്ട്. കണ്ടാല്‍ ഈ വഴിയൊക്കെ ഒന്നു വരാന്‍ പറയണേ’ എന്നായിരുന്നു മല്ലിക സുകുമാരന്റെ കമന്റ്. സംഭവം ആരാധകര്‍ ഒന്നടങ്കം ഏറ്റെടുത്തു.
മല്ലികയെ സമാധാനിപ്പിച്ചും പൂര്‍ണിമയെ വിമര്‍ശിച്ചും ചിത്രത്തിന് നിരവധി പേര്‍ കമന്റ് ചെയ്തു. ചര്‍ച്ച ചൂടു പിടിച്ചതോടെ വീണ്ടും കമന്റുമായി മല്ലിക സുകുമാരന്‍ രംഗത്തെത്തി. എന്റെ മൂത്ത മോളെ ഒന്നു ചൊടിപ്പിക്കാന്‍ പറഞ്ഞതല്ലേ എന്നായിരുന്നു മല്ലിക സുകുമാരന്റെ അടുത്ത കമന്റ്. എന്തായാലും സംഭവം സോഷ്യല്‍മീഡിയ ഒന്നടങ്കം ആഘോഷിച്ചു.
