എആര്‍ മുരുകദോസ് സൂപ്പര്‍ സ്റ്റാര്‍ രജനീകാന്തിനെ നായകനാക്കി ഒരുക്കുന്ന ചിത്രമാണ് ‘ദര്‍ബാര്‍’. നീണ്ട കാലത്തെ ഇടവേളയ്ക്ക് ശേഷം സ്റ്റൈല് മന്നന്‍ പോലീസ് വേഷത്തില്‍ എത്തുന്ന ചിത്രം കൂടിയാണിത്. ചിത്രത്തില്‍ ആദിത്യ അരുണാചലം എന്ന പോലീസ് ഓഫീസര്‍ ആയിട്ടാണ് താരം എത്തുന്നത്. പൊങ്കല്‍ റിലീസായി എത്തുന്ന ചിത്രം കേരളത്തില്‍ വിതരണത്തിന് എത്തിക്കുന്നത് ഗൃഹലക്ഷ്മി പ്രൊഡക്ഷന്സും എസ് ക്യൂബ് ഫിലിംസു ചേര്‍ന്നാണ്. സൂപ്പര്‍ ഹിറ്റ് ചിത്രം ‘ഉയരെ’ മലയാളികള്‍ക്ക് നല്‍കിയത് എസ് ക്യൂബ് ഫിലിംസാണ്.
നയന്‍താരയാണ് ‘ദര്‍ബാറി’ലെ നായിക. തമിഴകത്തിന്റെ ലേഡി സൂപ്പര്‍ സ്റ്റാര്‍ നയന്‍താരയും സ്റ്റൈല് മന്നന്‍ രജനീകാന്തും ഒന്നിക്കുന്ന നാലാമത്തെ ചിത്രം കൂടിയാണിത്. കുസേലന്‍, ശിവജി, ചന്ദ്രമുഖി എന്നീ ചിത്രങ്ങളിലാണ് ഇരുവരും നേരത്തേ ഒരുമിച്ചത്. ബോളിവുഡ് താരം സുനില്‍ ഷെട്ടിയാണ് ചിത്രത്തില്‍ വില്ലന്‍ വേഷത്തില്‍ എത്തുന്നത്.
പ്രതിക് ബബ്ബാര്‍, യോഗി ബാബു, ജീവ, പ്രകാശ് രാജ്, നിവേത തോമസ്, സൂരി, ഹരീഷ് ഉത്തമന്‍, മനോബാല, സുമന്‍, ആനന്ദരാജ്, റാവു രമേശ്, ബോസ് വെങ്കട്ട് എന്നിവരാണ് ചിത്രത്തിലെ മറ്റ് താരങ്ങള്‍. ചിത്രത്തിന് സംഗീതം ഒരുക്കിയിരിക്കുന്നത് അനിരുദ്ധ് രവിചന്ദ്രന്‍ ആണ്.
