എം പത്മകുമാര്‍ മമ്മൂട്ടിയെ നായകനാക്കി ഒരുക്കിയ ബ്രഹ്മാണ്ഡ ചിത്രമാണ് ‘മാമാങ്കം’. ചിത്രത്തിലെ മനോഹരമായ ഗാനം അണിയറപ്രവര്‍ത്തകര്‍ പുറത്തുവിട്ടു. ‘പീലിത്തിരുമുടി’ എന്ന് ആരംഭിക്കുന്ന ഗാനത്തില്‍ സ്ത്രീ വേഷത്തിലാണ് മമ്മൂട്ടി എത്തിയിരിക്കുന്നത്. കഴിഞ്ഞ ദിവസം പുറത്തുവിട്ട ഗാനം യൂട്യൂബ് ട്രെന്‍ഡിങില്‍ അഞ്ചാം സ്ഥാനം കരസ്ഥമാക്കിയിരിക്കുകയാണ്.
ഗാനഗന്ധര്‍വന്‍ യേശുദാസ് ആണ് ഈ മനോഹരഗാനം ആലപിച്ചിരിക്കുന്നത്. റഫീഖ് അഹമ്മദിന്റെ വരികള്‍ക്ക് സംഗീതം ഒരുക്കിയത് എം ജയചന്ദ്രനാണ്. ചിത്രം ഇതിനോടകം തന്നെ നൂറുകോടി ക്ലബിലും ഇടംപിടിച്ചു കഴിഞ്ഞു. റിലീസ് ചെയ്ത് എട്ട് ദിവസത്തിനുള്ളിലാണ് ചിത്രം ഈ നേട്ടം കൈവരിച്ചത്.
മമ്മൂട്ടിയ്ക്ക് പുറമെ മാസ്റ്റര്‍ അച്യുതന്‍, ഉണ്ണി മുകുന്ദന്‍, കനിഹ, അനു സിത്താര, സുരേഷ് കൃഷ്ണ, സിദ്ദീഖ്, തരുണ്‍ അറോറ, സുദേവ് നായര്‍, പ്രാചി തഹ്ലാന്‍, കവിയൂര്‍ പൊന്നമ്മ, മണിക്കുട്ടന്‍, ഇനിയ, മണികണ്ഠന്‍ ആചാരി തുടങ്ങി വന്‍താരനിരയാണ് ചിത്രത്തില്‍ അണിനിരന്നത്. കാവ്യാ ഫിലിം കമ്പനിയുടെ ബാനറില്‍ പ്രവാസി വ്യവസായിയായ വേണു കുന്നപ്പള്ളിയാണ് ചിത്രം നിര്‍മ്മിച്ചത്.
Discussion about this post