മിഥുന്‍ മാനുവല്‍ തോമസ് കുഞ്ചാക്കോ ബോബനെ നായകനാക്കി ഒരുക്കുന്ന ക്രൈം ത്രില്ലറായ ‘അഞ്ചാം പാതിരാ’യുടെ റിലീസ് തീയ്യതി പ്രഖ്യാപിച്ചു. കുഞ്ചാക്കോ ബോബന്‍ തന്റെ ഫേസ്ബുക്ക് പോസ്റ്റിലൂടെയാണ് റിലീസ് തീയ്യതി അറിയിച്ചത്. ജനുവരി പത്തിനാണ് ചിത്രം തീയ്യേറ്ററുകളില്‍ എത്തുക.
മിഥുന്‍ മാനുവല്‍ ആദ്യമായി സംവിധാനം ചെയ്യുന്ന ക്രൈം ത്രില്ലര്‍ ചിത്രം കൂടിയാണിത്. അന്വേഷണ ഉദ്യോഗസ്ഥന്റെ വേഷത്തിലാണ് കുഞ്ചാക്കോ ബോബന്‍ ചിത്രത്തിലെത്തുന്നത്. ശ്രീനാഥ് ഭാസി, ഉണ്ണിമായ പ്രസാദ്, ജിനു ജോസഫ്, ഷറഫുദ്ധീന്‍, ഇന്ദ്രന്‍സ്, രമ്യാ നമ്പീശന്‍ എന്നിവരാണ് ചിത്രത്തിലെ മറ്റ് താരങ്ങള്‍.
‘അര്‍ജന്റീന ഫാന്‍സ് കാട്ടൂര്‍ക്കടവ്’ എന്ന ചിത്രത്തിന് ശേഷം മിഥുന്‍ മാനുവല്‍ സംവിധാനം ചെയ്യുന്ന ചിത്രമാണിത്. ആട്, ആന്‍മരിയ കലിപ്പിലാണ്, അലമാര, ആട് 2 എന്നിവയാണ് മിഥുന്‍ സംവിധാനം ചെയ്ത മറ്റ് ചിത്രങ്ങള്‍. ആഷിക്ക് ഉസ്മാന്‍ പ്രൊഡക്ഷന്‍സിന്റെ ബാനറില്‍ ആഷിക്ക് ഉസ്മാന്‍ ആണ് ചിത്രം നിര്‍മ്മിക്കുന്നത്.
