കാര്‍ത്തി നായകനായി തീയ്യേറ്ററുകളില്‍ എത്തിയ ഏറ്റവും പുതിയ തമിഴ് ചിത്രമാണ് ‘കൈദി’. ദീപാവലി റിലീസായി തീയ്യേറ്ററുകളിലെത്തിയ ചിത്രത്തിന് ഗംഭീര വരവേല്‍പ്പാണ് പ്രേക്ഷകര്‍ നല്‍കിയത്. ഇപ്പോഴിതാ ചിത്രത്തിന്റെ കേരളത്തിലെ കളക്ഷന്‍ റിപ്പോര്‍ട്ട് പുറത്തു വിട്ടിരിക്കുകയാണ്. ചിത്രത്തിന്റെ വിതരണക്കാരായ സ്ട്രെയ്റ്റ് ലൈന്‍ സിനിമാസ് ആണ് കളക്ഷന്‍ റിപ്പോര്‍ട്ട് പുറത്തു വിട്ടിരിക്കുന്നത്.
ആദ്യ ആഴ്ച ചിത്രം കേരളത്തില്‍ നിന്ന് നേടിയിരിക്കുന്നത് 5.26 കോടി രൂപയാണ്. കാര്‍ത്തിയുടെ സിനിമയ്ക്ക് കേരളത്തില്‍ നിന്ന് ലഭിക്കുന്ന ഏറ്റവും ഉയര്‍ന്ന കളക്ഷന്‍ കൂടിയാണിത്. ചിത്രം തമിഴ്‌നാട്ടില്‍ നിന്ന് ആദ്യ അഞ്ച് ദിവസം കൊണ്ട് 18.4 കോടി രൂപയാണ് നേടിയത്.
മാനഗരം എന്ന ചിത്രത്തിനു ശേഷം ലോകേഷ് കനകരാജ് സംവിധാനം ചെയ്ത ത്രില്ലര്‍ ചിത്രമാണ് ‘കൈദി’. ചിത്രത്തില്‍ കാര്‍ത്തിയെ കൂടാതെ മറ്റൊരു പ്രധാന കഥാപാത്രത്തെ അവതരിപ്പിച്ചത് നരേന്‍ ആണ്. നായിക ഇല്ലാത്ത പ്രണയ രംഗങ്ങളൊ ഗാനങ്ങളൊ ഇല്ലാത്ത ചിത്രം കൂടിയാണിത്.
