ടൊവീനോയുടെ നായികയായി മംമ്ത മോഹന്‍ദാസ് എത്തുന്നു. ചിത്രം ഫോറന്‍സിക് ലൂടെയാണ് ഇരുവരും ഒന്നിക്കുന്നത്. ടൊവീനോയും മംമ്തയും ഇത് ആദ്യാമായാണ് ഒന്നിച്ച് ചിത്രത്തില്‍ എത്തുന്നത്. ചിത്രത്തിന്റെ ഷൂട്ടിങ് തുടങ്ങിയ വിവരവും ടൊവീനോ ഫേസ്ബുക്കില്‍ കുറിച്ചു. ടൊവീനോ തോമസ് ഫോറന്‍സിക് ഉദ്യോഗസ്ഥനായാണ് ചിത്രത്തില്‍ എത്തുന്നത്.
അഖില്‍ പോള്‍, അനസ് ഖാന്‍ എന്നിവര്‍ ചേര്‍ന്നാണ് ചിത്രത്തിന് തിരക്കഥ ഒരുക്കിയിരിക്കുന്നതും ചിത്രത്തിന്റെ സംവിധാനം നിര്‍വ്വഹിക്കുന്നതും. ‘എടക്കാട് ബെറ്റാലിയന്‍ 06’ എന്ന ഹിറ്റ് ചിത്രത്തിന് ശേഷം ടൊവീനോ തോമസ് നായകനാകുന്ന ചിത്രം കൂടിയാണ് ഫോറന്‍സിക് . ചിത്രത്തിന്റെ തയ്യാറെടുപ്പുകളുടെ ഭാഗമായി ടൊവീനോ തിരുവനന്തപുരത്ത് പോലീസ് ആസ്ഥാനത്തുള്ള ഫോറന്‍സിക് ലാബും, രാജീവ് ഗാന്ധി ഇന്‍സ്റ്റിറ്റൂട്ടിലെ ഫോറന്‍സിക്ക് റിസര്‍ച്ച് സെന്ററും സന്ദര്‍ശിച്ചിരുന്നു.
ടൊവീനോയ്‌ക്കൊപ്പം നിരവധി കുട്ടികളും ചിത്രത്തില്‍ അഭിനയിക്കുന്നുണ്ട്. സിനിമയുടെ ഒഫീഷ്യല്‍ ഫേസ്ബുക്ക് പേജിലൂടെ മുന്‍പ് ടൊവീനോയോടൊപ്പം അഭിനയിക്കുന്ന കുട്ടികളെ പരിചയപ്പെടുത്തിയിരുന്നു. കാസ്റ്റിങ് കോളില്‍ നിന്ന് തിരഞ്ഞെടുത്ത 17 പുതുമുഖങ്ങളാണ് ചിത്രത്തില്‍ ഉള്ളത്.
നെവിസ് സോവ്യര്‍, സിജു മാത്യു എന്നിവരുടെ ജുവിസ് പ്രൊഡക്ഷന്‍സും രാജു മല്യത്തിന്റെ രാഗം മൂവീസും ചേര്‍ന്നാണ് ചിത്രത്തിന്റെ നിര്‍മ്മാണം. അഖില്‍ ജോര്‍ജാണ് ചിത്രത്തിന്റെ ഛായാഗ്രഹണം നിര്‍വ്വഹിക്കുന്നത്. ജെയ്ക്സ് ബിജോയ് ചിത്രത്തിന്റെ സംഗീത സംവിധാനം നിര്‍വ്വഹിക്കുന്നു.
