അഭിനയ ജീവിതം നെഞ്ചിലേറ്റി ഒട്ടനവധി പേരാണ് ടിക് ടോക്ക് എന്ന പ്ലാറ്റ്‌ഫോമില്‍ എത്തുന്നത്. തങ്ങളുടെ അഭിനയ കഴിവുകളും മറ്റും കാഴ്ചവെച്ച് വെള്ളിത്തിരയിലേയ്ക്ക് കയറിയവരും ഉണ്ട്. ഇപ്പോള്‍ ടിക് ടോകിലെ താരങ്ങള്‍ അണിനിരക്കുന്ന ഒരു ചിത്രം എത്തുകയാണ്.
നായകനായി എത്തുന്നത് മറ്റാരുമല്ല, ഏവരുടെയും ഇഷ്ടതാരം ഫുക്രുവാണ്. ടിക് ടോകില്‍ ഫുക്രുവിനെ അറിയാത്തവര്‍ ചുരുക്കമായിരിക്കും. തല്ലുംമ്പിടി എന്ന് പേര് ഇട്ടിരിക്കുന്ന ചിത്രത്തിലാണ് താരം എത്തുന്നത്. ഇപ്പോള്‍ ചിത്രത്തിന്റെ ടീസര്‍ അണിയറപ്രവര്‍ത്തകര്‍ പുറത്തുവിട്ടിരിക്കുകയാണ്.
ഫുക്രു ഉള്‍പ്പടെ പതിനഞ്ചോളം ടിക്ടോക്ക് താരങ്ങളാണ് സിനിമയില്‍ അഭിനയിക്കുന്നത്. പി സിനിമാസിന്റെ ബാനറില്‍ സജിത അജിത്, സോണിയ മാനുവല്‍, ദിവ്യ വൃദി എന്നിവര്‍ ചേര്‍ന്ന് നിര്‍മ്മിക്കുന്ന ചിത്രം സിനിമാ കോറിയോഗ്രാഫിയിലൂടെ ശ്രദ്ധേയനായ പ്രജിന്റെ ആദ്യ സംവിധാന സംരംഭമാണ്.
മലയാള സിനിമാ ചരിത്രത്തില്‍ തന്നെ ഇതാദ്യമായാണ് സോഷ്യല്‍ മീഡിയാ താരങ്ങള്‍ ബിഗ് സ്‌ക്രീനില്‍ എത്തുന്നതെന്ന് പ്രജിന്‍ പ്രതാപ് പറഞ്ഞു. ഷിനൂബ് ആണ് ഛായാഗ്രഹണം. സംഗീതം സുമേഷ് പരമേശ്വരന്‍. ഗാനരചന അജീഷ് ദാസന്‍, സന്തോഷ് വര്‍മ്മ എന്നിവര്‍ നിര്‍വഹിക്കുന്നു. എന്നാല്‍ ടീസറിനെ വിമര്‍ശിച്ചും അനുകൂലിച്ചും നിരവധി പേര് രംഗത്തുണ്ട്.
