ധ്യാന്‍ ശ്രീനിവാസന്‍ നിവിന്‍ പോളിയെ നായകനാക്കി ഒരുക്കിയ ‘ലവ് ആക്ഷന്‍ ഡ്രാമ’ അമ്പത് കോടി ക്ലബില്‍ ഇടം നേടി. നിവിന്‍ പോളി തന്റെ ഫേസ്ബുക്ക് പേജിലൂടെ ആണ് ചിത്രം അമ്പത് കോടി ക്ലബില്‍ ഇടം നേടിയ കാര്യം ആരാധകരുമായി പങ്കുവെച്ചത്. ചിത്രത്തെ സ്വീകരിച്ചതിന് പ്രേക്ഷകരോട് നന്ദിയും താരം പറഞ്ഞിട്ടുണ്ട്.
ഈ മാസം അഞ്ചിന് ഓണച്ചിത്രമായി തീയ്യേറ്ററുകളിലെത്തിയ ചിത്രം ഇപ്പോഴും നിറഞ്ഞ സദസിലാണ് പ്രദര്‍ശിപ്പിക്കുന്നത്. ചെറിയ ഒരു ഇടവേളയ്ക്ക് ശേഷം നയന്‍താര മലയാളത്തില്‍ തിരിച്ചെത്തിയ ചിത്രം കൂടിയാണിത്.
ശ്രീനിവാസന്റെ സൂപ്പര്‍ഹിറ്റ് മലയാള ചിത്രം വടക്കുനോക്കിയന്ത്രത്തിലെ തളത്തില്‍ ദിനേശന്‍, ശോഭ എന്നീ കഥാപാത്രങ്ങളുടെ പേരാണ് ചിത്രത്തിലെ പ്രധാന താരങ്ങള്‍ക്ക് നല്‍കിയത്. ഇത് തന്നെ ആയിരുന്നു ചിത്രത്തിന്റെ പ്രധാന ഹൈലൈറ്റും. അജു വര്‍ഗീസ് നിര്‍മ്മാതാവാകുന്നു എന്ന പ്രത്യേകത കൂടിയുണ്ടായിരുന്നു ഈ ചിത്രത്തിന്. ശ്രീനിവാസന്‍, മല്ലിക സുകുമാരന്‍, അജു വര്‍ഗീസ്, വിനീത് ശ്രീനിവാസന്‍, മൊട്ട രാജേന്ദ്രന്‍, രഞ്ജി പണിക്കര്‍, ജൂഡ് ആന്റണി എന്നിവരായിരുന്നു ചിത്രത്തിലെ മറ്റ് താരങ്ങള്‍.
