ടെലിവിഷന്‍ രംഗത്തെ മികച്ച പുരസ്‌കാരമായ അന്തര്‍ദേശീയ എമ്മി അവാര്‍ഡ്സ് 2019ന്റെ നോമിനേഷന്‍ പട്ടിക പ്രഖ്യാപിച്ചു. ഇത്തവണ മൂന്ന് വെബ് സീരീസ് നോമിനേഷന്‍ പട്ടികയില്‍ ഇടംപിടിച്ചിച്ചുണ്ട്. സെയ്ഫ് അലിഖാന്റെ ‘സേക്രഡ് ഗെയിംസ്’, രാധിക ആപ്‌തെയുടെ ‘ലസ്റ്റ് സ്റ്റോറീസ്’, ദി റീമിക്സ് എന്നീ മൂന്ന് ഇന്ത്യന്‍ വെബ് സിരീസുകളാണ് നോമിനേഷന്‍ പട്ടികയില്‍ ഇടംപിടിച്ചിട്ടുള്ളത്.
എമ്മി അവാര്‍ഡ്സിന്റെ ഡ്രാമ സിരീസ് വിഭാഗത്തിലാണ് സെയ്ഫ് അലിഖാന്‍ നായകനായി എത്തിയ സേക്രഡ് ഗെയിംസ് മത്സരിക്കുന്നത്. ലസ്റ്റ് സ്റ്റോറീസ് രണ്ട് മത്സര വിഭാഗങ്ങളിലാണ് ഇടംപിടിച്ചിട്ടുണ്ട്. ടെലിവിഷന്‍ മിനി-സിരീസ് വിഭാഗത്തിലും മികച്ച നടിക്കുള്ള അവാര്‍ഡിനുമാണ് (രാധിക ആപ്തെ) ലസ്റ്റ് സ്റ്റോറീസ് മത്സരിക്കുന്നത്. രണ്ട് സിരീസുകളുടെയും സംവിധായകരുടെ നിരയിലുള്ള അനുരാഗ് കശ്യപ് ഈ സന്തോഷം തന്റെ ആരാധകരുമായി ഇന്‍സ്റ്റഗ്രാം സ്റ്റോറിയിലൂടെ പങ്കുവെച്ചിട്ടുണ്ട്.
ദി റീമിക്സ് ഇടംപിടിച്ചിരിക്കുന്നത് നോണ്‍-സ്‌ക്രിപ്റ്റഡ് എന്റര്‍ടെയ്ന്‍മെന്റ് വിഭാഗത്തിലാണ്. ആകെ 11 വിഭാഗങ്ങളിലായി 44 നോമനേഷനുകളാണ് പ്രഖ്യാപിച്ചിട്ടുള്ളത്. 21 രാജ്യങ്ങളില്‍ നിന്നുള്ള ആര്‍ട്ടിസ്റ്റുകളാണ് പട്ടികയില്‍ ഇടംപിടിച്ചിട്ടുള്ളത്. നവംബര്‍ 25നാണ് അന്തിമ ഫലപ്രഖ്യാപനം.