തൊണ്ണൂറുകളുടെ കുട്ടികളുടെ സൂപ്പര്‍ഹീറോ ആയിരുന്നു ദൂരദര്‍ശനില്‍ സംപ്രേക്ഷണം ചെയ്തിരുന്ന ‘ശക്തിമാന്‍’. ഇപ്പോള്‍ വീണ്ടും ശക്തിമാന്‍ സോഷ്യല്‍ മീഡിയയില്‍ നിറഞ്ഞിരിക്കുകയാണ്. എന്നാല്‍ മുകേഷ് ഖന്നയ്ക്ക് പകരം മലയാളികളുടെ പ്രിയതാരം മുകേഷ് ആണ് ഇത്തവണ ശക്തിമാന്‍ ആയിരിക്കുന്നത്.
ഒമര്‍ ലുലു സംവിധാനം ചെയ്യുന്ന പുതിയ ചിത്രമായ ‘ധമാക്ക’യില്‍ ആണ് മുകേഷ് ശക്തിമാനായി പ്രത്യക്ഷപ്പെട്ടിരിക്കുന്നത്. ഒമര്‍ ലുലു തന്റെ ഫേസ്ബുക്ക് പോസ്റ്റിലൂടെ ആണ് ഈ ചിത്രം പങ്കുവെച്ചിരിക്കുന്നത്. ‘അന്തസ്സുള്ള ശക്തിമാന്‍’ എന്ന അടിക്കുറിപ്പോടെയാണ് ഒമര്‍ ലുലു ഈ ചിത്രം പങ്കുവെച്ചിരിക്കുന്നത്. ചിത്രം ഇതിനോടകം തന്നെ സോഷ്യല്‍ മീഡിയയില്‍ വൈറലായി കഴിഞ്ഞു.
ഒളിമ്പ്യന്‍ അന്തോണി ആദം എന്ന ചിത്രത്തിലൂടെ ബാലതാരമായി പ്രേക്ഷക ഹൃദയം കവര്‍ന്ന അരുണ്‍ ആണ് ചിത്രത്തിലെ നായകന്‍. നിക്കി ഗല്‍റാണിയാണ് നായിക. ധര്‍മ്മജന്‍ ബോള്‍ഗാട്ടി, മുകേഷ്, ഇന്നസെന്റ് എന്നിവരാണ് ചിത്രത്തിലെ മറ്റ് പ്രധാന താരങ്ങള്‍. ഗുഡ് ലൈന്‍ പ്രൊഡക്ഷന്‍സിന്റെ ബാനറില്‍ എംകെ നാസര്‍ ആണ് ചിത്രം നിര്‍മ്മിക്കുന്നത്.
