കലാഭവന്‍ ഷാജോണ്‍ പൃഥ്വിരാജിനെ നായകനാക്കി ആദ്യമായി സംവിധാനം ചെയ്യുന്ന ചിത്രമാണ് ‘ബ്രദേഴ്‌സ് ഡേ’. കഴിഞ്ഞ ദിവസം പുറത്തുവിട്ട ചിത്രത്തിന്റെ ട്രെയിലറിന് മികച്ച പ്രതികരണമാണ് ലഭിച്ചത്. ഇപ്പോഴിതാ ട്രോളന്മാര്‍ക്കായി ഒരു ചലഞ്ചുമായി രംഗത്ത് എത്തിയിരിക്കുകയാണ് ചിത്രത്തിന്റെ അണിയറപ്രവര്‍ത്തകര്‍.
ചിത്രത്തെ ട്രോളിയാല്‍ കൈനിറയെ സമ്മാനം നേടാം എന്നാണ് സംവിധായകന്‍ ഷാജോണ്‍ തന്റെ ഫേസ്ബുക്കില്‍ കുറിച്ചത്. ആഗസ്റ്റ് 26 മുതല്‍ റിലീസിന് ശേഷം വരെ ചിത്രത്തെ കുറിച്ച് ട്രോള്‍ ഉണ്ടാക്കി #BrothersdayTrollContets, #BrothersdayThisOnam എന്നീ ഹാഷ് ടാഗുകള്‍ ഉപയോഗിച്ച് ട്രോള്‍ ഗ്രൂപ്പുകളില്‍ പോസ്റ്റ് ചെയ്യുക. തെരഞ്ഞെടുക്കപ്പെടുന്ന അഞ്ച് മികച്ച ട്രോളന്മാര്‍ക്ക് അണിയറ പ്രവര്‍ത്തകരുടെ വക കൈനിറയെ സമ്മാനങ്ങള്‍ ലഭിക്കും എന്നാണ് ഫേസ്ബുക്ക് പോസ്റ്റില്‍ പറയുന്നത്.
പൃഥ്വിരാജ് നായകനായി എത്തുന്ന ചിത്രത്തില്‍ ഐശ്വര്യലക്ഷ്മി, പ്രയാഗ മാര്‍ട്ടിന്‍, മിയ, മഡോണ എന്നിവരാണ് നായികമാരായി എത്തുന്നത്. വിജയരാഘവന്‍, ധര്‍മ്മജന്‍, തമിഴ് താരം പ്രസന്ന, കോട്ടയം നസീര്‍, കൊച്ചുപ്രേമന്‍ എന്നിവരാണ് ചിത്രത്തിലെ മറ്റ് താരങ്ങള്‍. ഓണച്ചിത്രമായാണ് ചിത്രം തീയ്യേറ്ററുകളിലെത്തുക.
