കല്യാണി പ്രിയദര്‍ശന്‍ നായികയായി എത്തിയ തെലുങ്ക് ചിത്രം ‘രണരംഗം’ ഓണ്‍ലൈനില്‍ ചോര്‍ന്നു. തീയ്യേറ്ററുകളില്‍ വന്‍ വിജയകുതിപ്പില്‍ എത്തിയ ചിത്രം മിനിറ്റുകള്‍ക്കുള്ളിലാണ് ചോര്‍ന്നത്. തമിഴ്‌റോക്കേഴ്‌സ് തന്നെയാണ് ചിത്രത്തിന്റെ വ്യാജ പതിപ്പ് പുറത്തുവിട്ടത്.
അതേസമയം സിനിമകളുടെ വ്യാജ പതിപ്പുകള്‍ പ്രചരിപ്പിക്കുന്ന തമിഴ്‌റോക്കേഴ്‌സ് പോലുളള വെബ്‌സൈറ്റുകളെ ബ്ലോക്ക് ചെയ്യാന്‍ ദില്ലി ഹൈക്കോടതി നിര്‍ദ്ദേശം നല്‍കിയിരുന്നു. സിനിമകള്‍ അനൌദ്യോഗികമായി സ്ട്രീം ചെയ്യുന്ന തമിഴ്‌റോക്കേഴ്‌സ്, ഈസിടിവി, കാത്മൂവീസ്, ലൈംടോറന്റ്‌സ് തുടങ്ങിയ വെബ്‌സൈറ്റുകള്‍ ബ്ലോക്ക് ചെയ്യാനാണ് ഇന്റര്‍നെറ്റ് സേവനദാതാക്കളോട് ദില്ലി ഹൈക്കോടതി ആവശ്യപ്പെട്ടിരുന്നത്. വെബ്‌സൈറ്റ് ലഭ്യമാകുന്ന യുആര്‍എലുകള്‍, പ്രസ്തുത സൈറ്റുകളുടെ ഐപി അഡ്രസ് എന്നിവ ബ്ലോക്ക് ചെയ്യാനാണ് ആവശ്യപ്പെട്ടിരിക്കുന്നത്. ടെലികമ്മ്യൂണിക്കേഷന്‍സ് വകുപ്പിനോടും, വിവര സാങ്കേതിക മന്ത്രാലയത്തോടും വെബ്‌സൈറ്റുകളുടെ ‘ ഡൊമെയ്ന്‍ നെയിം’ റദ്ദ് ചെയ്യാനും ഹൈക്കോടതി നിര്‍ദ്ദേശം നല്‍കിയിരുന്നു.
സുധീര്‍ വര്‍മ്മ സംവിധാനം ചെയ്യുന്ന ‘രണരംഗം’ ല്‍ ശര്‍വാനന്ദാണ് നായകനായി എത്തുന്നത്. ചിത്രത്തില്‍ കാജല്‍ അഗര്‍വാള്‍, കല്യാണി പ്രിയദര്‍ശന്‍ എന്നിവരാണ് നായികമാര്‍. അതുല്‍ കുല്‍ക്കര്‍ണി, സുബ്ബരാജു, ബ്രഹ്മജി, ദേവയാനി, അരുണ്‍ വിജയ്, മാധവ് വാസ്, രാജീവ് കനകല, ആദര്‍ശ് ബാലകൃഷ്ണന്‍ എന്നിവരാണ് മറ്റ് താരങ്ങള്‍. സൂര്യദേവര നാഗ വംശിയാണ് ചിത്രം നിര്‍മ്മിക്കുന്നത്. പ്രശാന്ത് പിള്ള ആണ് ചിത്രത്തിന്റെ സംഗീതം നിര്‍വഹിച്ചിരിക്കുന്നത്.