പാട്‌ന: അറുപത് വര്‍ഷം കൊണ്ട് കോണ്‍ഗ്രസിന് സാധിക്കാത്തത് അഞ്ച് വര്‍ഷം കൊണ്ട് തന്നെ കൊണ്ട് എങ്ങനെ സാധിക്കുമെന്ന് പ്രധാനമന്ത്രി നരേന്ദ്ര മോഡി. പാട്‌നയിലെ തിരഞ്ഞെടുപ്പ് റാലിയ്ക്കിടെയാണ് കോണ്‍ഗ്രസിനെ രൂക്ഷമായി വിമര്‍ശിച്ച് മോഡി രംഗത്തെത്തിയത്. കോണ്‍ഗ്രസിനു നിങ്ങള്‍ 60 വര്‍ഷം നല്‍കി. ബിജെപിക്ക് 60 മാസങ്ങള്‍ നല്‍കൂ, രാജ്യത്ത് വികസനം കൊണ്ടുവരുമെന്നും പ്രധാനമന്ത്രി കൂട്ടിച്ചേര്‍ത്തു.
നിരവധി കാര്യങ്ങള്‍ ചെയ്തു തീര്‍ക്കേണ്ടതായിട്ടുണ്ട്, അത് ചെയ്യാനുള്ള സാമര്‍ഥ്യവുണ്ട്. എന്നാല്‍ അതിന് വേണ്ടിയുള്ള ശ്രമം അനിവാര്യമാണ്. അതിന് നിങ്ങളുടെ അനുഗ്രഹം എനിക്ക് ആവശ്യമാണ്. അതുകൊണ്ട് തന്നെ വാഗ്ദാനങ്ങള്‍ നിറവേറ്റാന്‍ തങ്ങള്‍ക്ക് ഒരു അവസരം കൂടി നല്‍കണമെന്നും മോഡി ആവശ്യപ്പെട്ടു.
കോണ്‍ഗ്രസ് അധികാരത്തിലിരിക്കുമ്പോള്‍ വികസനം പുറകോട്ടാണ് പോയത്. രാജ്യത്ത് വിലക്കയറ്റം, ഭീകരത, അക്രമം, അഴിമതി, കള്ളപ്പണം തുടങ്ങിയവയെല്ലാം കോണ്‍ഗ്രസ് കാലഘട്ടത്തില്‍ വര്‍ദ്ധിച്ചെന്നും മോഡി ആരോപിച്ചു. രാജ്യത്തിന്റെ സമൃദ്ധി, വിശ്വാസ്യത, സായുധസേനയുടെ ആത്മവീര്യം തുടങ്ങിയവയെല്ലാം ചോര്‍ന്നു പോയതായും അദ്ദേഹം പറഞ്ഞു. ബിഹാറില്‍ തിരഞ്ഞെടുപ്പ് പ്രചാരണങ്ങള്‍ക്ക് തുടക്കം കുറിച്ചുകൊണ്ടുള്ള പരിപാടിയില്‍ സംസാരിക്കുകയായിരുന്നു അദ്ദേഹം.
Discussion about this post