പാലക്കാട്: ആശുപത്രിയില്‍ വെച്ച് യുവതിയെ പാമ്പുകടിച്ചു. പാലക്കാട് ജില്ലയിലെ ചിറ്റൂര്‍ താലൂക്ക് ആശുപത്രിയില്‍ വെച്ചാണ് സംഭവം. പുതുനഗരം കരിപ്പോട് സ്വദേശി ഗായത്രിയെയാണ് പാമ്പുകടിച്ചത്.
ഇന്ന് രാവിലെ പതിനൊന്നുമണിയോടെയാണ് സംഭവം. പനി ബാധിതയായ മകളെയും കൊണ്ട് ഡോക്ടറെ കാണാനായി എത്തിയതായിരുന്നു ഗായത്രി.
കുട്ടിയെ ഡോക്ടര്‍ പരിചരിക്കുന്നതിനിടെയാണ് യുവതിയെ പാമ്പുകടിച്ചത്. വിദഗ്ധ ചികിത്സയ്ക്കായി യുവതിയെ പിന്നീട് ജില്ലാ ആശുപത്രിയിലേക്ക് മാറ്റി.
ഗായത്രിയുടെ ആരോഗ്യത്തില്‍ ആശങ്കപ്പെടേണ്ടതില്ലെന്നും 24 മണിക്കൂറും നിരീക്ഷണത്തില്‍ തുടരണമെന്നും ഡോക്ടര്‍മാര്‍ പറഞ്ഞു.
അതേസമയം, യുവതി പാമ്പു കടിയേറ്റതിന് പിന്നാലെ ആശുപത്രി അധികൃതരെ അറിയിച്ചെങ്കിലും അവരുടെ ഭാഗത്തുനിന്ന് ഒരു സഹകരണവും ഉണ്ടായില്ലെന്ന് പഞ്ചായത്ത് അംഗം മാധ്യമങ്ങളോട് പറഞ്ഞു.
Discussion about this post