കണ്ണൂര്‍: കണ്ണൂര്‍ പാനൂര്‍ വിഷ്ണുപ്രിയ വധക്കേസില്‍ വിധി കാത്ത് കേരളം. ശിക്ഷ തിങ്കളാഴ്ച വിധിക്കും. സൗഹൃദത്തില്‍ നിന്ന് പിന്‍വാങ്ങിയതിന്റെ പേരില്‍ 23 കാരി വിഷ്ണുപ്രിയയെ അതിക്രൂരമായി കൊലപ്പെടുത്തിയ കൂത്തുപറമ്പ് സ്വദേശി ശ്യാംജിത്ത് കുറ്റക്കാരനെന്ന് കോടതി കണ്ടെത്തിയിരിക്കുകയാണ്.
ഒരാളെ എങ്ങനെ കഴുത്തറുത്ത് കൊല്ലാം എന്നത് ഇന്റര്‍നെറ്റ് സെര്‍ച്ച്, പിടിക്കപ്പെടാതിരിക്കാന്‍ ക്രൈംത്രില്ലര്‍ സിനിമ പലവട്ടം കണ്ടു. പരമാവധി ശിക്ഷ എത്ര കിട്ടുമെന്നും, ജയിലില്‍ നിന്ന് എത്ര വര്‍ഷം കഴിഞ്ഞ് പുറത്തിറങ്ങാന്‍ കഴയുമെന്നുമെല്ലാം സെര്‍ച്ച് ചെയ്ത് പഠിച്ചു. ഒരുപാട് കാരണങ്ങള്‍ കൊണ്ട് അപൂര്‍വ്വങ്ങളില്‍ അപൂര്‍വ്വമായി പരിഗണിക്കാന്‍ കഴിയുന്ന ഒന്നാണ് വിഷ്ണുപ്രിയ വധക്കേസ്.
പ്രണയനൈരാശ്യത്തിന്റെ പകയില്‍ പെണ്‍കുട്ടിയുടെ വീട്ടില്‍ അതിക്രമിച്ചുകയറി ശ്യാംജിത് വിഷ്ണുപ്രിയയെ ക്രൂരമായി കൊലപ്പെടുത്തുകയായിരുന്നു. വിധി പറഞ്ഞത് തലശ്ശേരി അഡീഷണല്‍ ജില്ലാ സെഷന്‍സ് കോടതി ജഡ്ജി എവി മൃദുല. പ്രോസിക്യൂഷന്‍ ഹാജരാക്കിയ ശാസ്ത്രീയ തെളിവുകളുള്‍പ്പെടെ അംഗീകരിച്ചായിരുന്നു വിധി.
2022 ഒക്ടോബര്‍ 22നായിരുന്നു സംഭവം. സുഹൃത്തുമായി വീഡിയോ കോളില്‍ സംസാരിച്ചിരിക്കെ വിഷ്ണുപ്രിയയുടെ കിടപ്പുമുറിയിലേക്ക് അതിക്രമിച്ചു കയറി ശ്യാംജിത്. ചുറ്റിക കൊണ്ട് തലയ്ക്കടിച്ചു വീഴ്ത്തി. കഴുത്തറത്ത് കൊലപ്പെടുത്തി. മരിച്ച ശേഷവും പത്തിലധികം തവണ കുത്തിപ്പരിക്കേല്‍പ്പിച്ചു.
ശരീരത്തിലാകെ 29 മുറിവുകള്‍. വീഡിയോ കോളിലുണ്ടായിരുന്ന പൊന്നാനി സ്വദേശി പ്രധാന സാക്ഷിയായി.
ആയുധം വാങ്ങിയതിന്റെയും പാനൂരില്‍ എത്തിയതിന്റെയും സിസിടിവി ദൃശ്യങ്ങളും ശക്തമായ തെളിവായി.
വിഷ്ണുപ്രിയയുടെ സുഹൃത്തിനെ വധിക്കാനും ശ്യാംജിത് പദ്ധതിയിട്ടിരുന്നു. അഞ്ചാം പാതിരയെന്ന ക്രൈം ത്രില്ലര്‍ സിനിമ പലതവണ കണ്ടു. കുറ്റബോധമില്ലെന്നും പതിനാല് വര്‍ഷം കഴിഞ്ഞ് പുറത്തിറങ്ങി ജീവിക്കാമല്ലോ എന്നുമായിരുന്നു പ്രതി അന്വേഷണത്തിനിടെ ആവര്‍ത്തിച്ചത്.
Discussion about this post