ദുബായ്: പ്രവാസി മലയാളിയുടെ മൃതദേഹം 14 ദിവസത്തെ കാത്തിരിപ്പിന് ശേഷം വീട്ടുകാര്‍ക്ക് വിട്ടുനല്‍കി. ദുബായില്‍ മരിച്ച തൃശൂര്‍ ഗുരുവായൂര്‍ കാരക്കാട് വള്ളിക്കാട്ടുവളപ്പില്‍ സുരേഷ് കുമാറിന്റെ (59) മൃതദേഹമാണ് രണ്ടാഴ്ചക്ക് ശേഷം വിട്ടുനല്‍കിയത്.
ആശുപത്രിയില്‍ പണം അടയ്ക്കാന്‍ വൈകിയതാണ് മൃതദ്ദേഹം വിട്ടുകിട്ടാന്‍ വൈകിയതിന്റെ കാരണം. ബില്ലായി ആശുപത്രിയില്‍ അടയ്ക്കേണ്ടിയിരുന്ന മുഴുവന്‍ തുകയും സൗദി ജര്‍മന്‍ ആശുപത്രി അധികൃതര്‍ വേണ്ടെന്ന് വെച്ചു.
ഇതോടെയാണ് മൃതദേഹം വിട്ടുകിട്ടിയത്. മൃതദേഹം ആശുപത്രിയില്‍ നിന്ന് മുഹൈസിനയിലെ (സോണാപൂര്‍) മെഡിക്കല്‍ ഫിറ്റ്നസ് സെന്ററിലേക്ക് മാറ്റി. വൈകിട്ട് എംബാമിങ് നടപടികള്‍ നടക്കും.
തുടര്‍ന്ന് നാളെ രാവിലെ ആറ് മണിക്ക് ഷാര്‍ജ-കൊച്ചി എയര്‍ ഇന്ത്യ എക്സ്പ്രസ് ഫ്ലൈറ്റ് ഇകെ412ല്‍ മൃതദേഹം നാട്ടിലേക്ക് കൊണ്ടുപോകും. സുരേഷ് കുമാര്‍ ഏപ്രില്‍ 22നാണ് ദുബായിലെ സൗദി ജര്‍മന്‍ ആശുപത്രിയില്‍ മരിച്ചത്.
എന്നാല്‍ 4,59,000 രൂപ അടയ്ക്കാന്‍ ബാക്കിയുള്ളതിനാല്‍ ആശുപത്രിയില്‍ നിന്നു മൃതദേഹം വിട്ടുകൊടുത്തില്ല. ഇത്രയും പണം നല്‍കാന്‍ കുടുംബത്തിന് കഴിഞ്ഞിരുന്നില്ല. ഇതോടെ ഭാര്യയും മൂന്ന് മക്കളുമടങ്ങുന്ന കുടുംബം മൃതദേഹം വിട്ടുകിട്ടുന്നതിനായുള്ള കാത്തരിപ്പിലായിരുന്നു.
Discussion about this post