മലയാളികളുടെ എക്കാലത്തേയും പ്രിയപ്പെട്ട നടിമാരില്‍ ഒരാളാണ് ദിവ്യ ഉണ്ണി. താരം ഇപ്പോള്‍ സിനിമാ ലോകത്ത് ഇല്ലെങ്കിലും നൃത്തവേദികളിലൂടെ കലാ ലോകത്ത് സജീവമാണ്.അതേസമയം, താരത്തിന്റെ ശോഭയ്ക്ക് എന്നും കളങ്കമായി ഉയര്‍ന്നുനില്‍ക്കുന്ന വിവാദമാണ് അന്തരിച്ച നടന്‍ കലാഭവന്‍ മണിയുമായി ബന്ധപ്പെട്ടിട്ടുള്ളത്. കലാഭവന്‍ മണിയോടൊപ്പം നായികയായി അഭിനയിക്കാനാകില്ലെന്നു ദിവ്യ ഉണ്ണി പറഞ്ഞെന്ന തരത്തില്‍ വര്‍ഷങ്ങളായി സോഷ്യല്‍മീഡിയയിലടക്കം ഈ വിവാദം സജീവ ചര്‍ച്ചയായി നിലനില്‍ക്കുന്നുണ്ട്.
ഇപ്പോഴിതാ ഈ വിഷയത്തില്‍ പ്രതികരിച്ച് രംഗത്തെത്തിയിരിക്കുകയാണ് ദിവ്യ ഉണ്ണി. സ്വകാര്യ യൂട്യൂബ് ചാനലിന് നല്‍കിയ അഭിമുഖത്തിലാണ് താരം ഈ വിവാദത്തോട് പ്രതികരിച്ചിരിക്കുന്നത്. വിനയന്‍ സംവിധാനം ചെയ്ത കല്യാണസൗഗന്ധികം എന്ന ചിത്രത്തിലാണ് ദിവ്യ ഉണ്ണി നായികയായി ആദ്യമായി എത്തിയത്. ഈ ചിത്രത്തില്‍ നായകന്‍ ദിലീപ് ആയിരുന്നെങ്കിലും ദിവ്യയുടെ കഥാപാത്രം കലാഭവന്‍ മണി അവതരിപ്പിക്കുന്ന കഥാപാത്രത്തിന്റെ മുറപ്പെണ്ണായിരുന്നു. ഒരു പാട്ട് രംഗത്തില്‍ ഇരുവരും പ്രണയിക്കുന്നതായി കാണിക്കുന്നുണ്ട്.
അതേസമയം, ഈ ഗാനരംഗത്തില്‍ കലാഭവന്‍ മണിക്കൊപ്പം അഭിനയിക്കില്ലെന്ന് ദിവ്യ ഉണ്ണി പറഞ്ഞുവെന്നും തുടര്‍ന്ന് ആ ഗാനരംഗം ഒഴിവാക്കിയെന്നുമാണ് പ്രചരിക്കുന്ന ആരോപണം. ഈ വിവാദത്തെ കുറിച്ച് അവതാരകന്‍ ചോദിച്ചപ്പോള്‍ ദിവ്യ പ്രതികരിച്ചതിങ്ങനെ.
”ആരാണ് ഇത് പറഞ്ഞത് എന്നറിയില്ല. അതെക്കുറിച്ച് സംസാരിക്കാനേയില്ല. കാരണം എന്താണെന്ന് വച്ചാല്‍ നമ്മള്‍ എന്തൊക്കെ പറഞ്ഞാലും അതൊരു ന്യായീകരണം പോലെയാകും. നമ്മള്‍ നമ്മുടെ തന്നെ ഭാഗം പറയുന്നത് പോലെ തോന്നും. അതുകൊണ്ട് തന്നെ ഞാന്‍ അതെക്കുറിച്ച് അഭിപ്രായം പറയാനില്ല. മണിച്ചേട്ടന്‍ പോയില്ലേ. ആദ്യത്തെ സിനിമ മുതല്‍ എത്രയോ സിനിമകള്‍ ഞങ്ങള്‍ ഒരുമിച്ച് ചെയ്തതാണ്.’
‘അദ്ദേഹത്തിന്റെ ആത്മാവിനോടുള്ള ബഹുമാനം നിലനിര്‍ത്തിക്കൊണ്ടാണ് പറയുന്നത്. സത്യാവസ്ഥ എന്താണെന്ന് എനിക്കറിയാം. കമന്റുകള്‍ എഴുതുന്നവര്‍ മറുപടി അര്‍ഹിക്കുന്നില്ല. സ്വന്തം സമയം പാഴാക്കി, മറ്റുള്ളവരെ കുത്തി നോവിക്കുന്നവര്‍ക്ക് വേണ്ടി നമ്മുടെ സമയം പാഴാക്കുന്നതില്‍ അര്‍ഥമില്ല. ഞാന്‍ ഇത്തരം കമന്റുകള്‍ വായിക്കാറില്ല”- ദിവ്യ ഉണ്ണി വിശദമാക്കി.
Discussion about this post