കോട്ടയം: ഈരാറ്റുപേട്ടയില്‍ നാലര വയസുകാരനെ തട്ടിക്കൊണ്ടുപോകാന്‍ ശ്രമമെന്ന് പരാതി. സംഭവത്തില്‍ പോലീസ് അന്വേഷണം ആരംഭിച്ചു. ഇക്കഴിഞ്ഞ വ്യാഴാഴ്ചയാണ് സംഭവം.
ഈരാറ്റുപേട്ട തെക്കേക്കരയില്‍ ഗവണ്മെന്റ് ഹയര്‍ സെക്കന്ററി സ്‌കൂളിന് സമീപം താമസിക്കുന്ന നാലര വയസുകാരനെയാണ് തട്ടിക്കൊണ്ടു പോകാന്‍ ശ്രമം നടന്നെന്നാണ് പരാതി.
വീടിന് സമീപം കളിക്കുകയായിരുന്നു കുട്ടി. അന്യ സംസ്ഥാന തൊഴിലാളി എന്ന് സംശയിക്കുന്നയാള്‍ മിഠായി നല്‍കി വിളിച്ചുകൊണ്ടു പോകുകയായിരുന്നു. ഇതേ സമയം അതുവഴി വന്ന കോളേജ് വിദ്യാര്‍ത്ഥിനിയായ അയല്‍വാസിയെ കണ്ട് കുട്ടി സംസാരിക്കുകയും തുടര്‍ന്ന് വിദ്യാര്‍ത്ഥിനി ഒച്ച വെച്ചതിനെ തുടര്‍ന്ന് കുട്ടിയെ ഉപേക്ഷിച്ച് അയാള്‍ ഓടി രക്ഷപ്പെടുകയുമായിരുന്നു.
സംഭവത്തില്‍ കുട്ടിയുടെ പിതാവ് പോലീസില്‍ പരാതി നല്‍കി. എന്നാല്‍ പോലീസ് അന്വേഷണം തുടങ്ങിയെങ്കിലും പ്രതിയെ കുറിച്ച് സൂചന കിട്ടിയിട്ടില്ല.
Discussion about this post