പേരൂർക്കട: ഓടിക്കൊണ്ടിരുന്ന ബസിൽ വെച്ച് യുവതിക്ക് നേരെ ലൈംഗിക അതിക്രമം കാണിച്ച റിട്ട. ജില്ലാ ജഡ്ജി അറസ്റ്റിൽ. കിളിമാനൂർ സ്വദേശിയായ റിട്ട. ജില്ലാ ജഡ്ജി രാമബാബു(62)വാണ് അറസ്റ്റിലായത്. ഇയാൾക്കെതിരായ യുവതിയുടെ പരാതിയെ തുടർന്ന് മണ്ണന്തല പോലീസാണ് പ്രതിയെ പിടികൂടിയത്.
റിട്ട. ജില്ലാ ജഡ്ജി രാമബാബു കിളിമാനൂരിൽ നിന്നാണ് ബസിൽ കയറിയത്. പിന്നീട് സ്ത്രീകളുടെ സീറ്റിൽ തനിച്ച് ഇരിക്കുകയായിരുന്ന യുവതിയെ ശല്യം ചെയ്യുകയായിരുന്നു.
വ്യാഴാഴ്ച ഉച്ചയ്ക്ക് 11.30ഓടെയായിരുന്നു സംഭവം. കേശവദാസപുരം എത്തിയപ്പോഴേക്കും ഉപദ്രവം സഹിക്കാതെ യുവതി ബഹളം വച്ചു. തുടർന്ന് ബസ് ജീവനക്കാർ പോലീസിനെ അറിയിക്കുകയായിരുന്നു.
പോലീസെത്തി അറസ്റ്റ് രേഖപ്പെടുത്തി ഇയാളെ കോടതിയിൽ ഹാജരാക്കി. കോടതി ജാമ്യം അനുവദിച്ചു.
Discussion about this post