മലയാളത്തിലെ യുവതാരങ്ങളിൽ ശ്രദ്ധേയനായ ഫഹദ് ഫാസിൽ ഇപ്പോഴിതാ തന്റെ വാഹനശേഖരം വിപുമലമാക്കിയിരിക്കുകയാണ്. ലംബോർഗിനിയുടെ ആഡംബരമാണ് ഫഫയുടെ വാഹന കമ്മ്യൂണിറ്റിയിലെ പുതിയ അംഗം. ലംബോർഗിനിയുടെ എസ്‌യുവി മോഡലായ ഉറുസാണ് ഫഹദ് ഫാസിൽ സ്വന്തമാക്കിയിരിക്കുന്നത്.
3.15 കോടി രൂപ മുതൽ വില ആരംഭിക്കുന്ന ഈ ആഡംബര വാഹനം ആലപ്പുഴ ആർടി ഓഫീസിൽ രജിസ്റ്റർ ചെയ്തു. ജൂലായ് മാസം ഒടുവിലാണ് ഈ വാഹനം ഫഹദ് സ്വന്തമാക്കി രജിസ്റ്റർ ചെയ്തിരിക്കുന്നത്.
എട്ട് സ്പീഡ് ഓട്ടോമാറ്റിക് ട്രാൻസ്മിഷനൊപ്പം ഏത് ടെറൈനിലും ഓടിക്കാൻ കഴിയുന്ന ആറ് ഡ്രൈവിങ്ങ് മോഡുകളാണ് ഉറുസിലുള്ളത്. സുരക്ഷയുടെ കാര്യത്തിലും മുൻപന്തിയിലുള്ള ഈ വാഹനം ആഗോളതലത്തിൽ പോലും ലംബോർഗിനിയുടെ ടോപ്പ് സെല്ലിങ്ങ് മോഡലായി മാറിയിരിക്കുകയാണ്.
സ്പോർട്സ് കാറിന്റെയും എസ്‌യുവിയുടെയും സവിശേഷതകൾ ഒരുപോലെ കാണിക്കുന്ന വാഹനം, ആഡംബര എസ്‌യുവി ഫോക്സ്‌വാഗണിന്റെ എംഎൽബി ഇവോ പ്ലാറ്റ്ഫോമിലാണ് ഒരുങ്ങിയിരിക്കുന്നത്. 3.6 സെക്കന്റിൽ 100 കിലോമീറ്റർ വേഗവും 12.8 സെക്കൻഡിൽ 200 കിലോമീറ്റർ വേഗതയും കൈവരിക്കാൻ ശേഷിയുള്ളതാണ് ഈ വാഹനം.
ഇക്കാരണങ്ങൾ കൊണ്ടുതന്നെ ഉറുസിന് ‘സൂപ്പർ എസ്‌യുവി’ എന്ന വിശേഷണവുമുണ്ട്. 305 കിലോമീറ്ററാണ് പരമാവധി വേഗം. നാല് ലിറ്ററിന്റെ ട്വിൻ ടർബോ വി-8 എൻജിനാണ് ലംബോർഗിനി ഉറുസിന് കരുത്തുനൽകുന്നത്. ഇത് 650 ബിഎച്ച്പി പവറും 850 ന്യൂട്ടൺമീറ്റർ ടോർക്കുമാണ് ഉത്പാദിപ്പിക്കുന്നത്.
ALSO READ- ജോർദാൻ രാജകുമാരൻ വിവാഹിതനാകുന്നു; വധു സൗദി സ്വദേശിനി രജ്വ അൽ സെയ്ഫ്
ഈ വർഷം ആദ്യം ടൊയോട്ടയുടെ ആഡംബര എംപിവി മോഡലായ വെൽഫയർ ഫഹദ് ഫാസിൽ സ്വന്തമാക്കിയിരുന്നു. പിന്നാലെ, ജർമൻ സൂപ്പർ കാർ നിർമാതാക്കളായ പോർഷെയുടെ സ്റ്റൈലിഷ് വാഹനമായ 911 കരേര എസ് എന്ന മോഡലും അദ്ദേഹം ഗ്യാരേജിലെത്തിച്ചു. പൈതൺ ഗ്രീൻ നിറത്തിലെത്തിയ ഇന്ത്യയിലെ ആദ്യ 911 കരേര എസ് ആയിരുന്നു ഫഹദ് സ്വന്തമാക്കിയത്.
Discussion about this post