കൊച്ചി: കഴിഞ്ഞ തിങ്കളാഴ്ച പുലര്ച്ചെ ദേശീയപാതയില് കാര് നിയന്ത്രണംവിട്ട് മീഡിയനിലേക്ക് ഇടിച്ചുകയറിയുണ്ടായ അപകടത്തില് മോഡലുകള് മരിച്ചതിനു പിന്നാലെ പരിക്കേറ്റ് ചികിത്സയിലായിരുന്ന യുവാവും മരിച്ചു. തൃശ്ശൂര് വെമ്പല്ലൂര് കട്ടന്ബസാര് കറപ്പംവീട്ടില് അഷ്റഫിന്റെ മകന് കെ.എ. മുഹമ്മദ് ആഷിഖ് (25) ആണ് മരിച്ചത്. കാറില് കൂടെയുണ്ടായിരുന്ന മുന് മിസ് കേരളയും ആറ്റിങ്ങല് സ്വദേശിയുമായ അന്സി കബീര് (25), മിസ് കേരള മുന് റണ്ണറപ്പും തൃശ്ശൂര് സ്വദേശിയുമായ അന്ജന ഷാജന് (24) എന്നിവര് സംഭവസ്ഥലത്തുതന്നെ മരിച്ചിരുന്നു.
തലയ്ക്കും നെഞ്ചിനും ഗുരുതരമായി പരിക്കേറ്റ് എറണാകുളം മെഡിക്കല് സെന്റര് ആശുപത്രിയില് വെന്റിലേറ്ററില് കഴിയവെയാണ് ആഷിഖിന്റെ അന്ത്യം. പുലര്ച്ചെ ഒരു മണിയോടെ ദേശീയപാതയില് പാലാരിവട്ടത്തെ ഹോളി ഡേ ഇന് ഹോട്ടലിന് മുന്നിലായിരുന്നു പ്രദേശത്തെ നടുക്കിയ അപകടമുണ്ടായത്. മുന്നില്പ്പോയ ബൈക്കില് ഇടിക്കാതിരിക്കാന് വെട്ടിച്ചപ്പോള് കാര് നിയന്ത്രണം നഷ്ടമായി പ്രധാന റോഡിനേയും സര്വീസ് റോഡിനേയും വേര്തിരിക്കുന്ന മീഡിയനിലിടിക്കുകയായിരുന്നു.
കാറിന് പിന്നില് വലതുവശത്തിരുന്ന ആഷിഖിന് മുന്നോട്ട് തെറിച്ച് ഗുരുതരമായി പരിക്കേറ്റു. കാര് ഓടിച്ചിരുന്ന മാള സ്വദേശി അബ്ദുള് റഹ്മാന് കാര്യമായ പരിക്കില്ലാതെ രക്ഷപ്പെട്ടിരുന്നു.
Discussion about this post