സിയോള്‍ : കാമുകിയെ വഞ്ചിച്ചുവെന്ന ആരോപണത്തെത്തുടര്‍ന്ന് പ്രശസ്ത കൊറിയന്‍ താരം സിയോണ്‍ ഹോവിനെതിരെ കടുത്ത നടപടി സ്വീകരിച്ച് സിനിമാ ലോകം. കരാറൊപ്പിട്ട ഏതാനും സിനിമകളില്‍ നിന്നും ഷോയില്‍ നിന്നും നടനെ ഒഴിവാക്കിയാണ് നടപടി.
ദക്ഷിണ കൊറിയന്‍ ചിത്രങ്ങളിലെ ഏറ്റവും താരമൂല്യമുള്ള നടന്മാരിലൊരാളാണ് കിം സിയോണ്‍. സിയോണ്‍ തന്നെ വഞ്ചിച്ചുവെന്നും ഗര്‍ഭം അലസിപ്പിക്കാന്‍ ശ്രമിച്ചുവെന്നും ആരോപിച്ച് കുറച്ച് ദിവസങ്ങള്‍ക്ക് മുമ്പാണ് ഇയാളുടെ കാമുകി രംഗത്തെത്തിയത്. തുടര്‍ന്ന് നടനെതിരെ സമൂഹമാധ്യമങ്ങളില്‍ വലിയ രീതിയില്‍ ക്യാംപെയ്‌നുകള്‍ പൊട്ടിപ്പുറപ്പെട്ടിരുന്നു. ഇതിന്റെ ഫലമെന്നോണമാണ് സിനിമകളില്‍ നിന്നുള്ള ഒഴിവാക്കല്‍.
എന്നാല്‍ സംഭവം വിവാദമായതിന് പിന്നാലെ സിയോണ്‍ യുവതിയോട് മാപ്പ് പറയുകയും ഇവര്‍ ഇത് സ്ഥിരീകരിക്കുകയും ചെയ്തു. തങ്ങള്‍ പരസ്പരം ഒരുപാട് സ്‌നേഹിച്ചിരുന്നുവെന്നും വിവാദങ്ങളുടെ പേരില്‍ അദ്ദേഹത്തിന്റെ കരിയര്‍ തകരുന്നത് കാണാന്‍ ആഗ്രഹിക്കുന്നില്ലെന്നും അവര്‍ വ്യക്തമാക്കി.
ഇതിനിടെ സമൂഹമാധ്യമങ്ങളില്‍ ചിലര്‍ യുവതിയുടെ ചിത്രങ്ങള്‍ പ്രചരിപ്പിക്കുകയും സിയോണിന്റെ ആരാധകര്‍ യുവതിക്ക് നേരെ വധഭീഷണി ഉയര്‍ത്തുകയും ചെയ്തിരുന്നു. ഇതിനെതിരെ പരാതി നല്‍കാനൊരുങ്ങുകയാണ് യുവതി.
Discussion about this post